भाडळे : व्यवसायात झालेले नुकसान भरून काढण्यासाठी विमा कंपनीकडून लाभ घेण्यासाठी स्वतःच्याच खुनाचा बनाव करून त्यासाठी समान शरीरयष्टीच्या मित्राचा खून करून फरारी झालेल्या सुमित सुरेश मोरे यास पोलिसांनी अटक करत तीनच दिवसांत गुन्हा उघड केला. तानाजी बाबा आवळे (रा. उकिर्डे, ता. माण) असे खून झालेल्या व्यक्तीचे नाव आहे. 

ताज्या बातम्यांसाठी डाऊनलोड करा ई-सकाळचे ऍप

पोलिसांनी दिलेल्या माहितीनुसार, मंगळवारी (ता. 21) भाडळे येथील बोधेवाडी घाटमाथ्यावर जळलेल्या अवस्थेत कार (एमएच 01 डीबी 7105) व अर्धवट जळलेल्या अज्ञात व्यक्तीचा मृतदेह आढळून आला होता. याबाबत खात्री करून नातेवाइकांनी करून हा मृतदेह सुमित सुरेश मोरे (रा. महिमानगड, ता. माण) याचा असल्याचे पोलिसांना सांगितले होते. पोलिस अधीक्षक तेजस्वी सातपुते यांच्या सूचनेनुसार वेगवेगळ्या ठिकाणी पथके पाठवून तपास सुरू करण्यात आला होता. त्यातून खुनाचे गुढ उलघडले. 

स्वतःवर प्रोटीन व्यवसायात झालेले कर्ज फेडण्यासाठी दीड कोटीचा विमा उतरवून त्याचा लाभ घेण्यासाठी सुमित मोरे याने स्वतःच्याच शरीरयष्टीचा तरुण तानाजी बाबा आवळे यास आमिष दाखवून फसवून दहिवडीला बोलावून घेतले. तेथे त्याचा डोक्‍यात वार करून त्याचा खून केला. पुरावा नष्ट करून विमा कंपनीची फसवणूक करण्यासाठी बोधेवाडी घाटात हा मृतदेह व स्वतःचीच कार पेटवून दिली. हा प्रकार उघडकीस आल्यानंतर जेजुरी येथून सुमितला अटक करून आज न्यायालयात हजर करण्यात आले. सहायक पोलिस निरीक्षक घोंगडे, पोलिस उपनिरीक्षक पाटील, पोलिस नाईक कुंभार, मोरे, पवार यांच्यासह पुसेगावचे सहायक पोलिस निरीक्षक समाधान घोडके, लोणंदचे सहायक पोलिस निरीक्षक चौधरी यांनी हा गुन्हा उघडकीस आणला.