बेळगाव : प्रगतिशील लेखक संघातर्फे आयोजित पहिले मराठी साहित्य संमेलन यशस्वी करण्याचा निर्धार शुक्रवारी (ता. १५) गिरीश कॉम्प्लेक्समधील शहीद भगतसिंग सभागृहात झालेल्या पूर्वतयारी बैठकीत घेण्यात आला. यावेळी काही महत्वाचे निर्णयही घेण्यात आले. संघाचे अध्यक्ष आनंद मेणसे अध्यक्षस्थानी होते.

कार्यवाह कृष्णा शहापूरकर यांनी प्रास्ताविक केले. संमेलन २३ व २४ एप्रिलला मराठी विद्यानिकेतन शाळेच्या प्रांगणातील दिवंगत भाई एन. डी. पाटील नगरीत ज्येष्ठ साहित्यिक राजा शिरगुप्पे यांच्या अध्यक्षतेखाली होणार आहे. भाई एन. डी. पाटील यांनी अख्खे जीवन वंचितांसाठी वेचले. सीमाप्रश्‍नासाठी अतुलनीय योगदान दिले आहे. त्यांच्याप्रती कृतज्ञता व्यक्त करण्यासाठी साहित्यनगरीला त्यांचे नाव दिले आहे, अशी माहिती देण्यात आली. प्रख्यात गीतकार साहिर लुधियानवी यांची यंदा जन्मशताब्दी आहे.

यामुळे सभामंचाला त्यांचे नाव देण्याचा निर्णय घेण्‍यात आला. दिवंगत शिक्षणप्रेमी शंकर पाटील यांचे नाव प्रवेशद्वाराला देण्याचे ठरले. यावेळी प्रा. दत्ता नाडगौडा, ॲड. नागेश सातेरी, सदानंद सामंत, व्ही. एस. बिदनाळ, अनिल आजगावकर, मधू पाटील, विलास ताशिलदार, अर्जुन सांगावकर, प्रा. मयूर नागेनट्टी, कला सातेरी, लता पावशे, प्रभावती शहापूरकर, स्नेहल शहापूरकर, रोशनी हुंदरे, गायत्री गोडबोले, शामल तुडयेकर, दीपिका जाधव यांच्यासह विविध क्षेत्रातील मान्यवर उपस्थित होते. सहकार्यवाह अशोक आलगोंडी यांनी आभार मानले.