इस्लामपूर - स्वाभिमानी शेतकरी संघटनेच्या दूध संकलन बंदला आज वाळवा तालुक्‍यातील येवलेवाडी (ता. वाळवा) नजीक हिंसक वळण लागले. जिल्ह्यात पहिली ठिणगी पडली. पुणे-बंगळूर राष्ट्रीय महामार्गावरून मुंबईकडे निघालेल्या दुधाच्या टॅंकरच्या काचा स्वाभिमानी कार्यकर्त्यांनी येवलेवाडीनजीक फोडल्या. दगडफेक करून टॅंकरच्या समोरच्या काचा फोडून टॅंकरमधील दूध रस्त्यावर सोडले. टॅंकर वारणा दूध संघाचा असल्याचे समजते.

गाय दूध उत्पादकांच्या खात्यावर सरकारने प्रतिलिटर पाच रुपये अनुदान द्यावे, यासाठी आज दूध संकलन, तसेच वाहतूक बंदचे आवाहन करण्यात आले होते. काल कोल्हापूर येथे झालेल्या बैठकीत दूध उत्पादक कृती समितीने एक दिवस संकलन बंद करण्यास मान्यता दिली. तरीही टॅंकर मुंबईला निघाल्याचे समजताच संतापलेल्या स्वाभिमानी शेतकरी संघटनेच्या कार्यकर्त्यांनी सायंकाळी साडेपाचच्या सुमारास येवलेवाडीनजीक टॅंकर अडवून काचा फोडल्या. वीस-पंचवीस कार्यकर्ते एकत्र आले. सरकारविरोधात निषेधाच्या घोषणा दिल्या. दूध रस्त्यावर सोडून देऊन घटनास्थळावरून पसार झाले.

शेट्टींशी उद्धट वर्तन केल्याचा राग
खासदार राजू शेट्टी आज सातारा जिल्ह्यातील स्वाभिमानी शेतकरी संघटनेचे पदाधिकारी असलेल्या एकाच्या विवाहानिमित्त कऱ्हाड येथे गेले होते. आंदोलनाचा इशारा दिल्याच्या पार्श्वभूमीवर पोलिसांनी त्यांच्यावर "वॉच' ठेवला होता. लग्नाच्या ठिकाणी पोलिसांनी खासदार शेट्टी यांना उलटसुलट प्रश्न विचारले. पोलिसांच्या या उद्धट वर्तनाचा राग मनात धरून हे कृत्य केल्याचे काहींनी सांगितले.