ढालगांव : मराठा विरुद्ध ओबीसी समाजात (Maratha vs OBC) वाद पेटवला आहे. त्यामध्ये मोठ्या प्रमाणात राजकारण होताना दिसत आहे. पवारांनी (Sharad Pawar) जातीजातींत भांडणे लावून महाराष्ट्रात वातावरण बिघडविण्याचे काम केले असल्याचा आरोप आमदार गोपीचंद पडळकर (Gopichand Padalkar) यांनी केला.

आरेवाडी (ता. कवठेमहांकाळ) येथील बिरोबा बनात धनगर समाजाचा दसरा मेळावा (Dhangar Samaj Dasara Melava) झाला. त्यावेळी ते बोलत होते. ते म्हणाले, ‘जो बिरोबाचा भंडारा आडवा लावतो, त्याची मांडणी आडवी असते. त्याच्या आडवा जो कोणी येईल त्याला आडवा करण्याची क्षमता आमच्याकडे आहे. पवारांनी जातीजातीत भांडणे लावली आहेत. त्यामुळे शरद पवारांचे स्वप्न उद्ध्वस्त करण्याची वेळ आली आहे. मताचा वापर करून घेणारे व फेकून देणारे आता महाराष्ट्राचा चेहरा मोहरा बदलण्याचा बनाव करत आहेत.

चाळीस वर्षे तुम्ही कुठे गेला होता. महाराष्ट्राची सत्ता बदलण्याची ताकत बहुजन समाजातील लोकांत आहे. तीन लाख ओबीसींना घरे देण्याच काम केले. ओबसींची उत्पन्नाची आठ लाख रुपयांची अट रद्द करून पंधरा लाख रुपये करण्याचा क्रांतिकारक निर्णय राज्य सरकारने घेतला आहे. कोणाशीही संघर्ष करण्याची तयारी ठेवा. धनगड असल्याचे पत्रक रात्रीत रद्द करण्याची कार्यवाही केली. दुसरे पत्रक काढले. कोणी पत्रक काढले त्याच्यावर कारवाई झाली पाहिजे. बी. के. कोकरेंचा ज्यांनी घात केला त्यांना गाडण्याची वेळ आली आहे.

महाराष्ट्र, कर्नाटक, आंध्रप्रदेश राज्यातील बिरोबा भक्त हा वीर आहे. त्याच्यात लढण्याची क्षमता आहे. प्रस्थापित लोकांना धडा शिकविण्याची वेळ आली आहे. येणाऱ्या निवडणुकीत त्याग करायचा आहे. संधी मिळेल तिथे लढले पाहिजे. निवडणुकीत ज्यांची निवडणूक जिंकण्याची क्षमता आहे. आशा बहुजन समाजाच्या पोराला पाठिंबा दिला पाहिजे. आपली लढाई अंतिम टप्प्यात आहे. नवरात्रीचे नऊ दिवस संपत आले आहेत.

विजयादशमीची वाट पाहा. राज्यसरकारणे आता कशाचीही वाट न पाहता जीआर काढावा व त्याची अंमलबजावणी करावी.’ यावेळी जगन्नाथ जानकर, उत्तम चव्हाण, उल्लास धायगुडे, समाधान कोळेकर, दादा लवटे, दौलत शितोळे यांची भाषणे झाली. यावेळी ब्रह्मानंद पडळकर, जगन्नाथ कोळेकर, राहुल कोळेकर, समाधान कोळेकर, रामचंद्र पाटील, रमेश कोळेकर, एन. टी. कोळेकर, काशिलिंग कोळेकर, भरमू कोळेकर यांच्यासह विविध भागांतून समाजातील लोकांनी उपस्थिती लावली होती.

प्रचंड जोश अन् उत्साह

आरेवाडी बनात दसरा मेळाव्यासाठी बाजूला पिवळे झेंडे लावल्याने रस्ते पिवळे झाले होते. भव्य व्यासपीठ उभारण्यात आले होते व त्यावर एकही खुर्ची ठेवली गेली नाही. दसरा मेळाव्यासाठी तरुणाईमध्ये प्रचंड जोश अन् उत्साह पसरला होता. तसेच मेळाव्यासाठी काही ठिकाणी स्क्रीनची व्यवस्था केली होती.