घाटनांद्रे : कवठेमहांकाळ तालुक्याच्या खरीप हंगाम पार्श्वभूमीवर शेतकऱ्यांनी पेरणीसाठी घाई करू नये. चांगला, दमदार पाऊस व पुरेशी ओल झाल्यानंतरच पेरणी करावी, बी-बियाणे, खते खरेदी करताना योग्य ती काळजी घ्यावी, असे आवाहन कृषी विभागामार्फत (Agriculture Department) करण्यात आले आहे.

दरम्यान, घाटमाथ्यावरील गावांसह तालुक्यात १३ हजार २५४ टन रासायनिक खतांची आवश्यकता आहे. त्यानुसार कृषी विभागाकडून खतांची मागणी करण्यात आली आहे. या हंगामात शेतकरी ज्वारी, बाजरी, मका या पिकांबरोबर तूर, मूग, उडीद, भुईमूग, सोयाबीन ही पिके घेतात.

या पिकांच्या पेरणीसाठी (Kharif Season) बी-बियाणांबरोबर पिकांचे उत्पादन चांगले येण्यासाठी रासायनिक खतांची मात्रा देणे आवश्यक असते. त्यानुसार आवश्यक असणारी युरिया, डी. ए. पी., एम. ओ. पी., एस. एस. पी., एन. पी. के. या खतांची १३ हजार २५४ टन इतकी मागणी कृषी विभागाकडून करण्यात आली आहे.

अद्याप खरिपाच्या पेरण्या सुरू झाल्या नसल्या तरी पेरणी कालावधीत रासायनिक खते उपलब्ध असणे आवश्यक आहे. तालुक्यासाठी युरिया ३६४७ टन, डी.ए.पी. १४६२ टन, एम. ओ. पी. १४८२ टन, एस. एस. पी. २१२० टन आणि एन. पी. के. ४५४३ टन या रासायनिक खतांची मागणी करण्यात आली आहे. खरीप हंगामाच्या पेरण्या सुरू होताच ही रासायनिक खते कृषी सेवा केंद्रांतून उपलब्ध होण्याची शक्यता आहे.