मिरज : अंड्याची पोळी करून दिली नसल्याच्या कारणावरून मुलाने आपल्या आईवरच काचेच्या बाटलीने हल्ला केला.

ही घटना तालुक्‍यातील खंडेराजुरी येथे घडली. आई जखमी झाली आहे. अरुणा गोपीनाथ घनसरे (वय 64) असे त्यांचे नाव आहे. या प्रकरणी मिरज ग्रामीण पोलीस ठाण्यात मुलगा शशांक गोपिनाथ घनसरे (वय 21) याच्याविरुद्ध गुन्हा नोंद झाला आहे. 

खंडेराजुरी येथील पाण्याच्या टाकीजवळ राहणाऱ्या अरुणा घनसरे यांचा मुलगा शशांक हा व्यसनी आहे. तो मद्यपान करून घरी आला होता. त्याने आईला अंड्याची पोळी करून मागितली. मद्यपी मुलाकडून हा वारंवार त्रास होत असल्याने वैतागलेल्या आईने अंड्याची पोळी करून देण्यास नकार दिला. त्यावेळी मुलगा शशांक आणि आई अरुणा यांच्या बरीच वादावादी झाली.

त्या वादावादीतून शशांकने घरातील काचेची बाटली आईच्या डोक्‍यात घातली. त्यत्त अरुणा घनसरे या जखमी झाल्या आहेत. त्यांनी मुलगा शशांक विरुद्ध मिरज ग्रामीण पोलीस ठाण्यात तक्रार दिली. मिरज ग्रामीण पोलिसांनी त्याच्याविरुद्ध गंभीर दुखापतीचा गुन्हा दाखल केला आहे. त्याला अद्याप अटक करण्यात आलेली नाही.