रायबाग : घरगुती भांडणातून महिलेने दोन मुलांसह विहिरीत उडी घेऊन आत्महत्या केल्याची घटना रविवारी (ता. २९) सकाळी बोमनाळ (ता. रायबाग) येथे उघडकीस आली. यल्लव्वा अर्जुन करीहोळे (वय ३०), सातव्वा उर्फ स्वाती (वय ५), मुत्ताप्पा उर्फ सात्विक (दीड वर्षे) अशी मृतांची नावे आहेत.

याबाबत घटनास्थळ व पोलिसांतून (Raibag Police) मिळालेली माहिती अशी, बोमनाळ येथे अर्जुन करीहोळे हे पत्नी व मुलांसह राहतात. शनिवारी पती आणि पत्नीमध्ये किरकोळ कारणावरून भांडण झाले. यानंतर रागाच्या भरात यल्लवा आपल्या दोन्ही मुलांना घेऊन घरातून बाहेर पडली. गावातील एका जुन्या विहिरीत दोन्ही मुलांना तिने पहिल्यांदा ढकलून दिले. त्यानंतर स्वतःही आत्महत्या केली. बराचवेळ झाला तरी यलव्वा हिचा कोठे थांगपत्ता लागत नव्हता. अखेर गावातील एका विहिरीजवळ शोध घेतल्यानंतर त्या ठिकाणी यल्लव्वा आणि तिची मुले दिसून आली.

घटनास्थळी पोलिस तातडीने दाखल झाले. ग्रामस्थ व अग्निशामक दलाच्या प्रयत्नाने तिघांनाही बाहेर काढण्यात आले. उपचारासाठी पाठविले. मात्र, त्यापूर्वी तिघांचा मृत्यू झाल्याचे आढळून आले. रविवारी सकाळी घटना उघडकीस आल्यानंतर यावेळी गावातील नागरिकांची मोठी गर्दी झाली होती. नातेवाइकांनी तीनही मृतदेह पाहून हंबरडा फोडला. सरकारी दवाखान्यात शवविच्छेदन करून मृतदेह नातेवाइकांच्या ताब्यात देण्यात आले.

जिल्हा पोलिस प्रमुख डॉ. भीमाशंकर गुळेद यांनी संबंधित पोलिसांना तातडीने बचावकार्य करतानाच संबंधितांवर गुन्हा दाखल करण्याचे निर्देश दिले होते. रायबाग पोलिस ठाण्याचे पोलिस निरीक्षक बी. एस. मंटूर यांनी याप्रकरणी तक्रार दाखल करून घेतली असून, त्यानुसार पती अर्जुन विरोधात गुन्हा दाखल करण्यात आला आहे. पुढील चौकशी सुरू केली आहे.