निपाणी : आडी-बेनाडी मार्गावर झालेल्या मोटार सायकल व डंपर अपघातात मोटार सायकलस्वार ठार तर दोघे गंभीर जखमी झाल्याची घटना शुक्रवारी (ता. २२) दुपारी घडली. संभाजी ज्योती माने (वय ५५, रा. मडीलगे, ता. भुदरगड) असे मृताचे तर श्रुती बबन माने (वय ३८, रा. मडीलगे) व अविज्ञ माने (वय ३) असे गंभीर जखमींची नावे आहेत. घटनेची नोंद निपाणी ग्रामीण पोलिस स्थानकात झाली आहे.

याबद्दल पोलिसांनी दिलेली माहिती अशी, संभाजी माने हे श्रुती व अविज्ञ हिला आणण्यासाठी शिवापूरवाडी (ता. निपाणी) येथे गेले होते. दुपारी ३ वाजण्याच्या सुमारास शिवापूरवाडीहून मोटार सायकलीने (एमएच-०७-ई-६२७६) परतताना आडी-बेनाडी मार्गावर हंचिनाळ क्राॅसनजिक समोरून येणारया डंपर (केए-२२-ए-७४००)ची धडक मोटार सायकलीला बसली. मोटार सायकल डंपरखाली डाउन अडकली. त्यात मोटार सायकलवरील संभाजी माने, श्रुती व अविज्ञ यांना डोकीला व विविध ठिकाणी गंभीर दुखापत झाली.

जखमींना तातडीने महात्मा गांधी रुग्णालयात हलविण्यात आले. मात्र वाटेतच संभाजी माने यांचा मृत्यू झाला. श्रुती व अविज्ञ यांच्यावर गांधी रुग्णालयात प्राथमिक उपचार करून पुढील उपचारासाठी कोल्हापूर येथील रुग्णालयात हलविण्यात आले. घटनास्थळी वाहनदारकांसह लोकांनी गर्दी केली होती. निपाणी ग्रामीण पोलिसांनी अपघातस्थळी भेट देऊन पंचनामा केला.