किल्लेमच्छिंद्रगड (सांगली) : कोरोनामुळे गेली वर्षभर वाजंत्री व्यवसायास लागलेला ब्रेक आता निघण्यास सुरवात झाली आहे. अनलॉक काळात लग्न कार्ये हौसेत होऊ लागली आहेत. लग्नाचे देवक करण्यासाठी, वरातीसाठी आता बॅंडबाजा, बॅंजो वाजू लागले आहेत. गावातील चौकातून देवक करताना तसेच वरातीसमोर अहो, मामी तुमची मुलगी लयं सुंदर... पोलीसवाल्या... सायकलवाल्या... ब्रेक लावुन थांब... तू मुंगळा... मै गुड की गडी... आँखे तो खोलो स्वामी... वो बुलाती है... मगर जानेका नही... यासारख्या नव्या जुन्या मराठी, हिंदी गाण्यांवर तरुण कुरवले मंडळी ठेक्‍यात ताल धरू लागल्याने वर्षभरापूर्वी लग्नातील हरवलेली हौस वाळवा तालुक्‍यातील ग्रामीण भागात पून्हा परतू लागली आहे. 

लग्नसराईच्या चार महिन्यांच्या काळात कलाकारांना वर्षाची कमाई करुन देणारा वाजंत्री व्यवसाय लॉकडाऊन काळात वर्षभर बंद राहिला. विवाह कार्यावर मर्यादा आल्याने व्यवसायावर उपजीविका अवलंबून असलेल्या गोपाळ समाजाचे जगणे मुश्‍कील झाले. कलाकारांनी उधार, उसनवार करुन वर्ष काढले. वेळप्रसंगी सावकारी कर्ज घेऊन पोटाची खळगी भरली. अनलॉकच्या काळात लग्नाचा धडाका सुरु झाला आहे. बॅंड, बॅंजोस मागणी येऊ लागल्याने गोपाळ समाजाला जगण्यासाठी पुन्हा अच्छे दिन येण्याच्या आशा पल्लवीत झाल्या आहेत.

हेही वाचा - पास मिळाले, पण एसटी नाही ; सांगलीत विद्यार्थी, पालकांचे होताहेत हाल -

'किल्लेमच्छिंद्रगड येथील गावकुसाबाहेर राहणाऱ्या गोपाळ समाजाचा भटक्‍या विमुक्त जाती जमातीत समावेश होतो. बहुतांशी कुटुंबे भूमिहीन. कलाकारांचा राज्यभर लौकीक. ठराविक कलाकारांना इनामी जमिनी आहेत. काही कलाकारांच्या जमीन खासगी सावकारानी 99 वर्षाच्या कराराने बळकाविल्याची चर्चा आहे. समाजाच्या आर्थिक प्रगतीसाठी शासनाने लक्ष देऊन व्यवसायासाठी कर्जे देण्याची मागणी आहे. 

"सांगली, सातारा, कोल्हापूर जिल्ह्यात समाज मोठ्या प्रमाणात वाजंत्री व्यवसायात. कोरोनाने जगणे मुश्‍किल. वृध्द कलाकारांना शासनाने मानधन द्यावे. व्यवसायासाठी अल्पव्याजाने कर्जे हवीत. प्रगतीसाठी शिक्षिताना नोकऱ्यांत संधी हवी."

- धर्मा पवार, मालक, झंकार बॅंड कं. किल्लेमच्छिंद्रगड 

संपादन - स्नेहल कदम