तुळजापूर : जून संपत आला तरी राज्यात पाऊस नाही. पेरण्या सुरू झालेल्या नाहीत. अनेक समस्यांना सामोरे जात असलेल्या अन्नदाता शेतकऱ्यावर पुन्हा संकटाचे सावट आहे. सांगूनही काही ऐकले जात नाही. राज्यातील सरकार सुलतानी आहे, अशी टीका काँग्रेसचे प्रदेशाध्यक्ष नाना पटोले यांनी शुक्रवारी केली.

त्यांनी येथे तुळजाभवानी मातेचे दर्शन घेऊन शेतकऱ्यांवर अस्मानी संकट येऊ नये, असे साकडे घातल्याचे सांगितले. कोरोनानंतर राज्यात घटनाबाह्य सरकार आले. हे सरकार शेतकरीविरोधी आहे. राज्यात भ्रष्टाचारी यंत्रणा उभी राहिली आहे.

काँग्रेस नेत्या सोनिया गांधी यांनी शेतकऱ्यांचे कर्ज सरसकट माफ करावे, अशी सूचना केली होती. त्यानुसार महाविकास आघाडीचे मुख्यमंत्री उद्धव ठाकरे यांनी ही सूचना पाळून शेतकऱ्यांची अपेक्षापूर्ती केली होती. खोटे बोलणे आणि मूळ प्रश्नांना बगल देणे, ही त्यांची भूमिका आहे, असेही ते म्हणाले.