मिरज - चाचणी तत्त्वावर दोन महिन्यांसाठी मिरज - पंढरपूर - मुंबई मार्गावर गुरुवारपासून ( ता. 1 ) नवी एक्सप्रेस सुरु होत आहे. ही एक्स्प्रेस प्रत्येक गुरुवारी मुंबईतून छत्रपती शिवाजी महाराज टर्मीनसमधून सुटेल व शुक्रवारी मिरजेतून सुटेल.

या एक्स्प्रेसला शिवाजी महाराज टर्मीनस, ठाणे, कल्याण, लोणावळा, पुणे, पंढरपूर, कुर्डुवाडी, सांगोला, जतरोड, कवठेमहांकाळ व मिरज या स्थानकांत थांबा देण्यात आला आहे.  एक आॅगस्ट ते 30 सप्टेंबर हा या गाडीचा चाचणी कालावधी आहे. तिला बारा डबे आहेत. मुंबई - गदग ही एक्सप्रेस ( क्रमांक 11139 व 11140 ) सध्या आठवड्यातून सहा दिवस धावते. उर्वरीत एका दिवसासाठी तिला याच क्रमांकानीशी मिरज - पंढरपूर - मुंबई मार्गावर सोडण्यात येणार आहे. हे अंतर 563 किलोमीटर आहे. देखभाल व दुरुस्ती मुबंईतच होईल. 

वेळापत्रक असे - मुंबईत छत्रपती शिवाजी महाराज टर्मीनसमधून प्रत्येक गुरुवारी रात्री नऊ वाजून 20 मिनिटांनी सुटेल. पुण्यात मध्यरात्री 1.05, कुर्डुवाडी पहाटे 4.10, पंढरपूर पहाटे 5.50, सांगोला सकाळी 6.10 व मिरजेत शुक्रवारी सकाळी 8.20 वाजता येईल. परतीच्या प्रवासात मिरजेतून शुक्रवारी संध्याकाळी 5.50, सांगोला 7.28, पंढरपुरात रात्री साडेआठ, कुर्डुवाडीत रात्री पावणेदहा, पुण्यात मध्यरात्री 1.25 व मुंबईत छत्रपती शिवाजी महाराज टर्मीनसला शनिवारी पहाटे 5.10 वाजता पोहोचेल.

यानिमित्ताने मिरजेतून पंढरपूर, पुणे व मुंबईसाठी आणखी एक जादा एक्सप्रेस उपलब्ध झाली आहे. प्रवाशांचा प्रतिसाद पाहून तिचा कालावधी वाढवला जाऊ शकतो. गणेशोत्सव, दसरा सणांच्या पार्श्वभूमीवर तिला प्रतिसाद मिळण्याची अपेक्षा आहे.