निपाणी : महाराष्ट्र-कर्नाटक सीमाप्रश्नाची सुनावणी होणार आहे. अशातच महाराष्ट्रातील राजकीय नेते मंडळी बेळगावात येणार आहेत. त्या पार्श्वभूमीवर कर्नाटक-महाराष्ट्र सीमाभागात बंदोबस्त वाढविला आहे. या काळात नागरिकांनी आपले व्यवहार सुरळीत ठेवावेत, असे आवाहन बेळगाव जिल्हा पोलिस प्रमुख डॉ. संजीव पाटील यांनी केले. गुरुवारी (ता. १) दुपारी येथील ग्रामीण पोलिस ठाण्यात आयोजित पत्रकार बैठकीत ते बोलत होते.

डॉ. संजीव पाटील म्हणाले, ‘‘सीमाप्रश्नी सध्या सर्वोच्च न्यायालयात सुनावणी सुरू आहे. त्या पार्श्वभूमीवर सीमाभागातील सर्वच घडामोडीवर पोलिस यंत्रणा लक्ष ठेवून आहेत. सीमाभागातील गावासह शहराच्या ठिकाणी कोणत्याही परिस्थितीत नागरिकांना त्रास होणार नाही. सार्वजनिक मालमत्तेचे नुकसान होणार नाही, यासाठी जिल्हा पोलिस प्रशासनाने सर्वतोपरी बंदोबस्त केले आहे.’’

यावेळी त्यांनी मुरगूड रोडवरील आंतरराज्य सीमेवर भेट देऊन परिस्थितीचा आढावा घेतला. पोलिस अधिकाऱ्यांसमवेत बैठक घेऊन त्यांना आवश्यक सूचना केल्या. सीमाप्रश्नाच्या पार्श्वभूमीवर अथणी, कागवाड, कोगनोळी, बोरगावसह इतर आंतरराज्य मार्गांवर तपासणी नाके उभारले आहेत. एसआरपी सीआरपी पथकासह 500 पोलिस कार्यरत केले आहेत. शनिवारी किंवा मंगळवारी महाराष्ट्रातील मंत्री बेळगावात येणार असल्याची माहिती उपलब्ध झाली आहे.

अशावेळी त्यांना प्रवेश द्यायचा की नाही? याबाबत परिस्थिती पाहून निर्णय घेतला जाईल. त्याबाबत जिल्हाधिकारी योग्य तो निर्णय घेतील. त्यांच्या सूचनेनुसार पुढील कार्यवाही केली जाणार आहे. कर्नाटक, महाराष्ट्र सीमाभागात भाषिक, जातीय तेढ निर्माण करणाऱ्या समाजकंटकावर कारवाई करण्यासाठी पोलिस कटीबद्ध आहेत. निपाणीसह जिल्ह्यातील आंतरराज्य सीमेवरील परिस्थितीची निरंतर माहिती घेतली जात आहे. त्यामुळे सीमाभागातील नागरिकांनी आपापले व्यवसाय सुरू ठेवावेत.

यावेळी चिक्कोडीचे पोलिस उपअधीक्षक बसवराज एलीगार, चिक्कोडीचे पोलिस निरीक्षक आर. आर. पाटील, निपाणीचे मंडल पोलिस निरीक्षक संगमेश शिवयोगी, शहर पोलिस उपनिरीक्षक कृष्णवेणी गुर्लहोसूर, ग्रामीणचे उपनिरीक्षक अनिलकुमार कुंभार, बसवेश्वर चौक पोलिस ठाण्याचे गुन्हे शाखेचे उपनिरीक्षक डी. बी. कोतवाल, सदलगा पोलिस स्थानकाचे उपनिरीक्षक भरतगौडा, शेखर असोदे यांच्यासह पोलिस अधिकारी उपस्थित होते.