मुरगूड : निपाणी - मुदाळतिट्टा रस्त्यासाठी मुरगूडमध्ये बुधवारी झालेल्या रास्तारोको आंदोलनातील आंदोलकांवर पोलीसांनी खोटे गुन्हे दाखल केल्याबद्दल, पोलीसांच्या दडपशाही विरोधात आणि आंदोलकांची तक्रार दाखल करुन घेत नसल्याच्या निषेधार्त आज सकाळी सर्वपक्षीय रस्ता बचाव कृती समितीतर्फे शहरातून निषेध फेरी काढण्यात आली. या पार्श्वभूमीवर शहरात कडकडीत बंद पाळण्यात आला.

गेल्या चार वर्षापासून रखडलेल्या मुदाळ तिट्टा - निपाणी रस्त्यासाठी बुधवारी ( ता. २०) मुरगूड येथे सर्वपक्षीय रस्ता बचाव कृती समितीतर्फे रास्ता रोको आंदोलन केले होते.या आंदोलना दरम्यान सार्वजनिक बांधकाम उपविभाग, राधानगरीचे सहायक अभियंता अमित किरण पाटील यांनी आपल्याला पांडुरंग भाट,रवि परीट,दत्ता मंडलीक,व बजरंग पाटील (सर्व रा.मुरगूड ) यांनी शिवीगाळ करत मारहाण केली.व आपला शर्ट फाडला अशी तक्रार मुरगूड पोलीसांत दिली आहे.यामध्ये सतिश कृष्णकांत किल्लेदार हे जखमी झाल्याचीही फिर्याद दिली आहे. पोलीसांनी या चौघांवर गुन्हे दाखल केले आहेत.

पण मुरगूड पोलीसांनीच गुन्हा दाखल करण्यासाठी दबाव आणल्याचे व आंदोलनकर्त्यावर मुरगूड पोलीसांनी दाखल केलेले गुन्हे हे खोटे आहेत. शिवाय आंदोलकांनी दिलेल्या तक्रारीची पोलीस दखल घेत नाहीत. असे सर्वपक्षीय रस्ता बचाव कृती समितीचे म्हणणे आहे. परिणामी मुरगूड पोलीसांच्या दडपशाहीच्या विरोधात व आंदोलकांनी दिलेल्या तक्रारीची पोलीस दखल घेत नसल्याच्या निषेधार्थ आज सकाळी ९ वाजता शहरातून सर्वपक्षीय भव्य अशी निषेध फेरी काढण्यात आली. यावेळी शहरातील सर्व व्यापारी,दुकानदार यांनी व्यवहार कडकडीत बंद ठेवून पाठींबा दर्शविला. सणासुदीचे दिवस असल्याने दुपारनंत व्यवहार सुरु राहिले.

दरम्यान निषेध फेरी बसस्थानकावरुन सुरु झाली.ती नाका नं.१ ला गेली तेथून पोलीस ठाण्यावर जावून मुरगूड पोलीसांनी आंदोलकांवरील गुन्हे मागे घ्यावेत,रस्त्याची जबाबदारी असणाऱ्या अधिकाऱ्यांवर मनुष्य वधाचे गुन्हे दाखल करावेत यासह विविध मागण्यांचे निवेदन सर्वपक्षीय कृती समितीच्या वतीने इस्पुर्लीचे सहाय्यक पोलीस निरीक्षक विश्वास पाटील यांना देण्यात आले. आंदोलकांच्या मागण्यांचा निप:क्षपातीपणे तपास करुन योग्य ती कार्यवाही करु.असे आश्वासन विश्वास पाटील यांनी दिले.