निपाणी : बेळगाव मराठा मंडळ संचलित येथील मॉडर्न इंग्लिश स्कूलमध्ये विद्यार्थ्यांनी बनविलेल्या वस्तूंचे प्रदर्शन व विक्री झाली. शाळेच्या या उपक्रमाचे शिक्षक, पालकांनी कौतुक केले. शिवाय पालकांसह ग्राहकांनी या वस्तूंची खरेदी करून विद्यार्थ्यांना प्रेरणा दिली आहे.

दिवाळी निमित्त सजावटीसाठी आकाश कंदील, पणत्या व इतर साहित्य बाजारातून खरेदी केले जाते. पण विद्यार्थ्यांना विविध कलांची माहिती व्हावी, या उद्देशाने या उपक्रमाचे आयोजन केले होते. दिवाळीच्या सजावटीसाठी लागणाऱ्या विविध वस्तूंचे प्रदर्शन व विक्री या उपक्रमात १ ली ते १० वी च्या १५० विद्यार्थ्यांनी सहभाग घेतला होता. स्वतः विद्यार्थ्यांनी बनविलेल्या विविध प्रकारच्या पणत्या, आकाशदिवे, रांगोळी, मातीची खेळणी अशा अनेक वस्तुंचे प्रदर्शन पाहण्यासाठी व खरेदीसाठी असंख्य पालकांनी उपस्थिती दाखवून विदयार्थ्यांकडून वस्तूंची खरेदी करून प्रोत्साहन दिले.

विद्यार्थ्यांना दैनंदिन व्यवहाराचे ज्ञान होणे तसेच आपल्या परिसरातील किंवा परंपरेने चालत आलेल्या व्यवसायाची जाणीव व आवड निर्माण होवून विविध कौशल्याने परिपूर्ण असा विद्यार्थी निर्माण करणे, हा उद्देश ठेवून या कार्यक्रमाची आयोजन केल्याचे प्राचार्या स्नेहा घाटगे यांनी सांगीतले. विद्यार्थ्यांच्या या अनोख्या उपक्रमासाठी शाळेतील शिक्षकांचे सहकार्य व मार्गदर्शन लाभले.