बेळगाव : यमकनमर्डी येथे 16 डिसेंबरला भरमा भुपाळ धुपदाळ (रा. हत्तरगी) यांच्यावर झालेल्या गोळीबार प्रकरणी शुक्रवार (ता.1) एकाला अटक करण्यात आली आहे. प्रेमप्रकरणात अडथळा ठरल्याने त्यांच्यावर विनायक सोमशेखर होरगेरे (वय 26, रा. गणपत गल्ली यमकनमर्डी) याने गोळीबार केल्याचे तपासात स्पष्ट झाले असून संशयिताला न्यायालयासमोर हजर करण्यात आले असता त्याची रवानगी हिंडलगा कारागृहात करण्यात आली. 

16 डिसेंबरला भरमा हे आपल्या मित्रासोबत यमकनमर्डी येथे कट्ट्यावर चर्चा करत बसले होते. त्यावेळी तोंडावर मंकी कॅप घालून आलेल्या एका अनोळखीने त्यांच्यावर बंदुकीतून गोळी झाडून पलायन केले होते. या प्रकरणी यमकनमर्डी पोलिसात गुन्हा दाखल झाला होता. पोलिसांनी संशयिताच्या अटकेसाठी प्रयत्न सुरु ठेवले होते. वरील संशयिताला आज ताब्यात घेऊन कसून चौकशी केली असता त्याने भरमा यांच्यावर गोळीबार केल्याची कबुली दिली. विनायक हा एका तरुणीवर प्रेम करत होता.

हेही वाचा - आपल्या जीवाबरोबर मुक्‍या प्राणी, पशु-पक्षांचे, झाडांचे जीव वाचवण्यासाठी धडपडणारी तरुणाई 

संबधीत तरुणीचे भरमा यांचे नातेवाईक लागतात. त्यामुळे त्यांनी विनायकच्या प्रियसीचा दुसरीकडे साखरपुडा केला. त्यामुळे त्याच्या मनात भरमा यांच्याबद्दल खुन्नस निर्माण झाली होती. प्रेमप्रकरणात अडथळा ठरणाऱ्या भरमा यांचा काटा काढण्याच्या उद्देशाने विनायकने भरमा यांच्यावर गोळीबार केल्याचे तपासात पुढे आले आहे. यमकनमर्डीचे पोलीस उपनिरीक्षक सुनिल पाटील पुढील तपास करीत आहेत.  

संपादन - स्नेहल कदम