सोलापूर : सोलापूर जिल्हा परिषदेतील विरोधी पक्षनेते पद कोणाला मिळणार? याबाबतची उत्सुकता आता निर्माण होऊ लागली आहे. 68 पैकी सर्वाधिक 23 सदस्य असलेल्या राष्ट्रवादीला पुन्हा एकदा जिल्हा परिषदेतील विरोधी पक्षनेतेपद जाण्याची शक्‍यता आहे. 14 सदस्य असलेल्या भाजपचा पक्षनेता होईल, अशीही शक्‍यता वर्तविली जात आहे. जिल्हा परिषद अध्यक्षांच्या अधिकारात असलेल्या या निवडीकडे सर्वांचे लक्ष लागले आहे. 
हेही वाचा - नागरिकत्व दुरुस्ती कायद्यातून मुस्लिम टार्गेट 
जिल्हा परिषदेत सत्तेचे अजब रसायन जन्माला आले आहे. सदस्य संख्येने मोठे असलेल्या राष्ट्रवादी आणि भाजपचा एकही पदाधिकारी नाही. पाच सदस्य असलेल्या शिवसेनेचा अध्यक्ष तर तीन सदस्य असलेल्या समाधान आवताडे गटाचा उपाध्यक्ष झाला आहे. विषय समिती सभापती निवडीत सात सदस्य असलेल्या कॉंग्रेसला समिती मिळाली. गणपतराव देशमुख व दीपक साळुंखे-पाटील यांच्या आघाडीला दोन समित्या मिळाल्या. तीन सदस्य असलेल्या डोंगरे गटालाही एक समिती मिळाली आहे. जिल्हा परिषदेच्या राजकारणात ज्यांची शक्ती लहान परंतु निर्णायक आहे त्यांनाच पदे मिळाली आहेत. विरोधी पक्षनेतेपद राष्ट्रवादीला मिळाल्यास माळशिरस तालुक्‍यातील राष्ट्रवादीच्या सदस्यांनी अध्यक्षपदासाठी मतदान केले आहे. हा तांत्रिक मुद्दा समोर येण्याची शक्‍यता आहे. जिल्हा परिषदेतील पक्षनेतेपदी भाजपच्या सदस्याची वर्णी लागते की सांगोल्यातील शिवसेना आमदार शहाजी पाटील गटाच्या सदस्याची किंवा सभापती विजयराज डोंगरे यांच्या सदस्याला संधी मिळते या बद्दल देखील कमालीची उत्सुकता निर्माण झाली आहे.