पलूस (सांगली) - तालुक्यात वाळू, मुरुम, दगडाची बेकायदेशीर वाहतूक बंद असल्याचे सांगितले जाते, मात्र रात्रीच्यावेळी वाळू वाहतूक कशी सुरू असते ? ही वाळू येते कोठून ? वाळू वाहतुकीस कोणाचा आशीर्वाद आहे, असा सवाल नागरिकांतून विचारला जात आहे.
पलूस तालुक्यात बेकायदेशीरपणे वाळू, मुरुम व दगडाची वाहतूक होते. कृष्णा, येरळा नदीच्या पात्रातून वाळू उपसाबंदी आहे. मात्र, अनेकवेळा वाळू उपसा व वाहतूक करताना तहसीलदार राजेंद्र पोळ यांनी वाहने पकडून कायदेशीर कारवाई केली. पुन्हा पुन्हा वाळू चोरी व वाहतूक सुरूच आहे.
सध्या वाळूला सोन्याचा दर मिळत आहे. बाहेरील जिल्ह्यातील वाळूही तालुक्यात येते. रात्री आणि पहाटे वाळूचे ट्रक आणि डंपर येतात. अवैध वाळू वाहतुकीला कोणाचा आशीर्वाद आहे, असा सवाल नागरिक करीत आहेत.
दगड, माती आणि मुरुम वाहतूकही पलूस तालुक्यात मोठ्या प्रमाणात होते. नाममात्र रॉयल्टी भरुन, भरमसाठ मुरुम, दगड, मातीची वाहतूक होते. परवाने काढून देणे, कमीशन घेऊन वाळू, दगड, माती, मुरुम पुरवणारी एजंटांची साखळी तयार
झाली आहे.
तहसीलदार वारंवार बेकायदेशीर वाहतूकीवर कारवाई करतात. मात्र, पुन्हा वाहतूक सुरू असते. बेकायदेशीर वाळू, मुरुम, दगड वाहतूक होत नसेल तर मग ती रात्री आणि पहाटेच्या वेळी करण्याचे कारण काय. रात्री पोलिस फिरत असतात. पोलीस अशा वाहनांना अटकाव का करीत नाहीत, असा प्रश्न विचारला जात आहे.जिल्हाधिकारी, जिल्हा पोलीस प्रमुख, तहसीलदार, सहाय्यक पोलीस निरीक्षकांनी त्वरीत अशा अवैध वाहतूकीस आळा घालावा, अशी मागणी आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.