कोल्हापूर - राज्य नाट्य स्पर्धेच्या येथील केंद्रावर फिनिक्‍स क्रिएशन्सने बाजी मारली. या टीमने सादर केलेल्या "ह्येच्या आईचा वग' नाटकाने वैयक्तिक तीन बक्षीसांसह पहिल्या क्रमांकावर मोहोर उमटवली. इचलकरंजीच्या रंगयात्रा संस्थेच्या "हूज अफ्रेड ऑफ द व्हर्जिनिया वूल्फ' या नाटकाने दुसरा क्रमांक पटकावला. या दोन्ही नाटकांची अंतिम फेरीसाठी निवड झाली. येथील रूद्रांश ऍकॅडमीच्या "मोठ्यांचा शेक्‍सपियर' या नाटकाने तिसरा क्रमांक पटकावला. 

दरम्यान, त्यांना अनुक्रमे चाळीस हजार, तीस हजार, वीस हजार अशी पारितोषिके मिळतील. येथील संगीतसूर्य केशवराव भोसले नाट्यगृहात पंधरा नोव्हेंबर ते तेरा डिसेंबर दरम्यान स्पर्धेची प्राथमिक फेरी रंगली. एकूण 28 प्रयोग स्पर्धेत सादर झाले. प्रा. मधु जाधव, मुकुंद हिंगणे, गौरी लोंढे यांनी परीक्षक म्हणून काम पाहिले. 

स्पर्धेचा अनुक्रमे निकाल असा... 

0 दिग्दर्शन ः संजय मोहिते (ह्येच्या आईचा वग), अनिरूध्द दांडेकर (हूज अफ्रेड ऑफ द व्हर्जिनिया वूल्फ). 
0 प्रकाश योजना ः विनायक रानभरे (हूज अफ्रेड ऑफ द व्हर्जिनिया वूल्फ), तेजस कोळी (मोठ्यांचा शेक्‍सपियर). 
0 नेपथ्य ः अमोल नाईक (ह्येच्या आईचा वग), प्रविण लायकर (हूज अफ्रेड ऑफ द व्हर्जिनिया वूल्फ). 
0 रंगभूषा ः ओंकार पाटील (तुघलक, शिवाजी विद्यापीठ संगीत व नाट्यशास्त्र विभाग), सुनिता वर्मा (युध्द नको मज बुध्द हवा, निष्पाप कलानिकेतन, इचलकरंजी). 
0 उत्कृष्ट अभिनय रौप्यपदके ः सचिन वाडकर (ह्येच्या आईचा वग), कादंबरी माळी (हूज अफ्रेड ऑफ द व्हर्जिनिया वूल्फ). 
0 अभिनय गुणवत्ता प्रमाणपत्रे ः तेजस्विनी सोनसाळे (वृंदावन, वरेरकर नाट्यसंस्था, बेळगाव), प्रतिक्षा गवस (पुरूष, सुगुण नाट्य संस्था, कोल्हापूर), वैदेही सावंत (नटरंग, वसुंधरा संस्था, कोल्हापूर), पूर्वा कोडोलीकर (ऐश्‍वर्या ब्युटी पार्लर, भारतवीर मंडळ, कोल्हापूर), उज्वला खांडेकर-शहा (ऊन-पाऊस, गानकोकिळा कान्होपात्रा किणीकर स्मृती संस्था, कोल्हापूर), परसु गावडे (विच्छा माझी पुरी करा, साई नाट्यधारा मंडळ, हलकर्णी), युवराज केळुस्कर (तुघलक), निहाल रूकडीकर (मोठ्यांचा शेक्‍सपियर), रोहित पोतनीस (अंदाधुंद, परिवर्तन फाऊंडेशन, कोल्हापूर), सतीश तांदळे (देव हरवला, देवल क्‍लब, कोल्हापूर).