नगर : जिल्हा परिषदेतील बी.एड., तसेच पदव्युत्तर पदवी करणाऱ्या काही शिक्षकांकडूनच बनवाबनवी केली जात आहे. रजा न घेताच ते दोन्हीकडे "हजर' असल्याचा चमत्कार करीत आहेत. त्यांच्याकडून होणारी ही धूळफेक शिक्षण विभागाच्या लक्षात आली आहे. त्यामुळे या विभागाने सन 2001पासून चौकशी सुरू केली आहे. चौकशी झाल्यास शिक्षकांची "शाळा' उघडकीस येण्याची शक्‍यता आहे. या कार्यवाहीमुळे शिक्षणक्षेत्रात खळबळ उडाली आहे. 

हेही वाचा ट्रॉली चोर पकडले; तडजोड करून सोडलेही! 

चौकशी होणार 
जिल्हा परिषदेच्या शाळेतील अनेक शिक्षक नोकरी सांभाळून आपले पुढील शिक्षण करतात. हे शिक्षण बहिःस्थ व नियमित अशा दोन पद्धतीने घेतले जाते. बहिःस्थ प्रवेश घेणाऱ्यांना रजेची गरज भासत नाही. मात्र, नियमित शिक्षण घेणाऱ्या शिक्षकांना रजा अनिवार्य असते. मात्र, काहींनी रजा न घेताच शिक्षण पूर्ण केल्याची चर्चा आहे. त्यामुळेच शिक्षण विभागाने बी.एड. व इतर शिक्षण घेणाऱ्या शिक्षकांनी रजा किती घेतल्या? त्या रजांची नोंद सेवापुस्तकावर झाली आहे का? या संदर्भातील चौकशी करण्याचे आदेश शिक्षणाधिकाऱ्यांनी गटशिक्षणाधिकाऱ्यांना दिला आहे. शिक्षकांना नोटीस बजावून त्यांचे म्हणणे मागविण्यात येणार आहे. 

हेही वाचा क्रीडा संकुलातील दोन्ही इमारती जमीनदोस्त 

दोनशे दिवसांची उपस्थिती अनिवार्य 
बी.एड. व इतर पदवीचे नियमित शिक्षण घेत असताना महाविद्यालयामध्ये 70 ते 80 टक्के उपस्थिती अनिवार्य आहे. त्यामुळे नियमित प्रवेश घेतलेल्यांना सुमारे 200 दिवस महाविद्यालयात शिक्षणासाठी जाणे अनिवार्य असते. काहींची दोन्हीकडेही हजेरी आहे. गेल्या काही वर्षांपासून हा उपद्‌व्याप सुरू आहे. 

सुटीतही लबाडी 
शिक्षकांकडून दिवाळीच्या सुट्यांच्या काळात फसवणूक झाल्याची दाट शक्‍यता आहे. दिवाळीची सुटी लागण्यापूर्वी एक दिवस ते नेमणुकीच्या ठिकाणी हजर होतात. सुटी उपभोगल्यानंतर पहिल्या दिवशी शाळेत उपस्थित राहून नंतर जातात. हा फसवणुकीचा प्रकार आहे. शिक्षणासाठी रजा घेतल्यास ती सलगपणे घेणे आवश्‍यक असल्याचा नियम आहे. 

हेही वाचा 76 गावे पितात दूषित पाणी 
 

शिक्षक आणि शाळांची संख्या 
शाळांची संख्या ः 3575 
शिक्षकांची संख्या ः 11861 
बी.एड. करणारे एकूण शिक्षक ः 133 
रजा घेतलेले शिक्षक ः 125 
रजा न घेतलेले शिक्षक ः तीन 
अनियमित रजा घेतलेले शिक्षक ः पाच 

खुलासा मागविला 
जिल्ह्यात 135 जण नियमित शिक्षण घेत आहेत. या सर्वांना नोटीस देऊन त्यांच्याकडून खुलासा मागविला आहे. तो आल्यानंतरच त्यावर कारवाई करण्यात येईल. 
- रमाकांत काठमोरे, शिक्षणाधिकारी, माध्यमिक