इस्लामपूर : येथील राजारामबापू पाटील सहकारी साखर कारखान्याच्या (Rajarambapu Patil Cooperative Sugar Factory) अध्यक्षपदी प्रतीक जयंत पाटील यांची बिनविरोध निवड झालीये. संचालक मंडळाच्या बैठकीत एकमतानं हा निर्णय घेण्यात आला.

राजारामबापू पाटील साखर कारखान्याच्या अध्यक्षपदी माजी मंत्री, राष्ट्रवादीचे प्रदेशाध्यक्ष जयंत पाटील यांचे सुपुत्र प्रतीक पाटील (Pratik Jayant Patil) यांची एकमतानं निवड झाली. वयाच्या 32 व्या वर्षी प्रतीक यांनी आपले आजोबा राजारामबापू पाटील यांनी 1968 साली स्थापन केलेल्या या साखर कारखानदारीची धुरा अंगावर घेतलीये.

या निवडीनं जयंत पाटील यांच्या राजकारणातील वारस प्रतीक हेच असतील यावर शिक्कामोर्तब झालंय. उपाध्यक्षपदी विजयराव पाटील यांना कायम ठेवण्यात आलंय. कारखान्याच्या अध्यक्षपदानं प्रतीक पाटील यांची राजकारणात एन्ट्री होणार असल्याची चर्चा होती. अखेर वडील जयंत पाटील यांच्या पावलावर पाऊल ठेवत प्रतीक पाटील यांच्या रुपानं राजारामबापू पाटील यांच्या घराण्यातील तिसरी पिढी राजकारणात सक्रिय झालीये.