चिक्कोडी : बेळगाव जिल्हा विधान परिषद निवडणुकीतील दोन जागांसाठी शुक्रवारी (ता. १०) मतदान झाले. या निवडणुकीत कोण निवडून येणार, याची नेतेमंडळी आणि कार्यकर्त्यांना उत्सुकता शिगेला लागली असून त्यांचे भवितव्य मतपेटीतून आज (ता. १४) मतमोजणीतून उघडणार आहे. येथील आर. डी. कॉलेजमध्ये दोन स्ट्रॉंग रूममध्ये मतपेट्या ठेवल्या असून त्याची तीन रूममध्ये मतमोजणी होणार आहे. चिक्कोडीत गेले चार दिवसापासून जिल्हा पोलिस प्रमुख आणि अधिकाऱ्यांनी वरचेवर येऊन पाहणी करून काटेकोरपणे पोलिस बंदोबस्त केला आहे. आज होणाऱ्या मतमोजणीची तयारी प्रशासनाकडून पूर्ण झाली आहे.

बेळगाव जिल्ह्यात सहा उमेदवार रिंगणात होते. त्यासाठी 511 मतदान केंद्राची स्थापना करण्यात आली होती. त्यामध्ये एकूण ८ हजार आठशे 49 सदस्यांनी मतदानाचा हक्क बजावला. प्रत्येक केंद्रावर काटेकोरपणे नियमाचे पालन, पोलिस बंदोबस्त, व्हिडिओ कॅमेरे, फोटोग्राफर, आशा कार्यकर्त्याकडून तपासणी केली जात होती. यावेळी नियम कडक असल्याने कोणत्याही प्रकारचा अनुचित प्रकार मतदान केंद्रात घडू नये, त्यासाठी पारदर्शकपणा राबिविले आहेत.

जिल्ह्यात दोन जागांसाठी निवडणूक झाली. भाजपकडून महांतेश कवटगीमठ, काँग्रेसकडून चन्नराज हट्टीहोळी हे प्रत्येकी एकच उमेदवार दिले होते. त्यांच्या जोडीला अपक्ष म्हणून लखन जारकीहोळी यांनी निवडणूक लढविल्याने तिरंगी लढत लागली. आम आदमी पार्टीकडून शंकर हेगडे तर शंकर कुडसोमण्णावर आणि कमलेश गाणगी या आणखी दोन अपक्ष उमेदवारांनी आपले नशीब आजमावण्याचा प्रयत्न केला. या निवडणुकीत प्रचाराच्या रणधुमाळ्या पेटल्या होत्या. अखेर आज मंगळवारी (ता. 14) कोणत्या उमेदवाराचे भविष्य उघडणार, याकडे बेळगाव जिल्ह्यातील नेतेमंडळी व कार्यकर्त्यांना लक्ष लागून राहिले आहे.

मतमोजणीला किती वेळ लागणार हे निश्चित नाही

विधान परिषद मतमोजणी सकाळी 8 पासून आर. डी. कॉलेजमध्ये सुरू होणार आहे. कडक पोलिस बंदोबस्तात मतमोजणी तीन रूममध्ये होणार आहे. मत मोजणीला किती वेळ लागणार आहे, याची निश्चित वेळ सांगता येणार नाही असे चित्र आहे.