निपाणी : कोकण फाट्यासह परिसरात झालेल्या जोरदार पावसामुळे शुक्रवारपासून अनेक गावात पुराचे पाणी शिरले आहे. तर वेदगंगा नदीला (Vedhganga River) पूर येऊन यमगरणी (yamagarni) येथील पुणे-बंगळूर राष्ट्रीय महामार्गावर (Pune-Bangalore National Highway) पुलावर पाणी आल्याने रविवारी (ता. २५) सलग तिसरा दिवस महामार्गावरील वाहतूक बंद आहे. त्यामुळे सर्व वाहने रस्त्याच्या कडेला थांबूनच आहेत. त्यामुळे चालक, क्लिनरांचे मोठे हाल होत आहेत. पाणी पातळी कमी झाल्यास सायंकाळपर्यंत महामार्ग वाहतुकीसाठी खुला होण्याची शक्‍यता व्यक्त होत आहे. (Pune-Bangalore-National-Highway-Three-feet-water-Traffic-closed-yamagarni-nipani-live-update-akb84)

2019 साली असाच पाऊस झाल्याने तब्बल सात दिवस पुणे-बंगळूर राष्ट्रीय महामार्ग बंद होता. या काळातही एनडीआरएफ पथक, पोलिस यंत्रणा कार्यरत असल्याने कोणतीही जीवितहानी झाली नव्हती. गुरुवारी मध्यरात्रीपासून यमगरणी जवळील पुलापासून मांगूर फाट्यापर्यंत तब्बल सात फुट पाणी साचले होते. दोन दिवसापासून पाऊस कमी झाल्याने आता रस्त्यावरील पाणी उतरत असून अद्याप तीन फूट पाणी शिल्लक आहे. त्यामुळे अजूनही पोलिस प्रशासनाने वाहनांना रस्त्यावरून जाण्यास परवानगी दिलेली नाही.

रविवारी दिवसभर पाऊस थांबल्यास सोमवारपासून वाहनांना प्रवेश मिळण्याची शक्यता आहे.सलग तीन दिवस रस्ता बंद असल्याने दूध, फळे व जीवनावश्यक वस्तू करणाऱ्या वाहनधारकांचे मोठे नुकसान झाले आहे. निपाणी शहर आणि परिसरातील काही सामाजिक मंडळांनी रस्त्यावर थांबलेल्या वाहनचालकांना नाष्टा, जेवणाची सोय केल्याने थोडाफार दिलासा मिळत आहे. एकंदरीत महामार्ग कधी सुरू होणार याकडे सर्वांचे लक्ष लागले आहे.