रायबाग: बांधकाम साहित्य चोरी करणाऱ्या तेरदाळ येथील तीन जणांच्या टोळीला हारुगेरी पोलिसांनी मुगळखोड क्रॉसवर गजाआड केले. या कारवाईत त्यांच्याकडून चोरलेले साहित्य व त्यासाठी वापरलेले वाहन असा आठ लाखाचा मुद्देमाल जप्त केला. अल्लमप्रभू केळगिनमनी, दर्शन जारगौडर व रमेश भोसले (सर्व रा. व ता. तेरदाळ) अशी अटक केलेल्यांची नावे आहेत.

याबाबत पोलिसांकडून मिळालेली माहिती अशी, मुगळखोड क्रॉसवर संशयितरित्या हालचाली दिसून आल्याने हारुगेरी पोलिस ठाण्याच्या अधिकारी व कर्मचाऱ्यांनी अल्लमप्रभू केळगिनमनी, दर्शन जारगौडर यांना २१ फेब्रुवारीला ताब्यात घेतले. त्यांची चौकशी केली असता तालुक्यातील विविध गावातील अनेक ठिकाणी चोरी केल्याची कबुली त्यांनी दिली. तसेच चोरलेले बांधकाम साहित्य रमेश भोसले याला विकल्याचे सांगितले. त्यानंतर त्यांच्याकडून 6 लाख 55 हजार 700 रुपयांच्या 572 लोखंडी प्लेट व स्लॅबचे 47 जॅक आणि चोरीसाठी वापरले दीड लाख रुपये किंमतीचे टाटा-एस मालवाहू वाहन जप्त करण्यात आले. तिघाही आरोपींनी चोरीची कबुली दिली आहे.

जिल्हा पोलिस प्रमुख लक्ष्मण निंबर्गी, अथणीचे पोलिस उपाधीक्षक एस. व्ही. गिरीश, रायबागचे मंडल पोलिस निरीक्षक के. एस. हट्टी, हारुगेरी पोलिस ठाण्यातील गुन्हे अन्वेषण विभागाचे उपनिरीक्षक आर. आर. कंगनोळी, पोलिस उपनिरीक्षक राघवेंद्र खोत यांच्या मार्गदर्शनाखाली हनुमंत अंबी, आर. पी‌. कट्टेकरी, कुमार पवार, बी. एल. होसट्टी, अनिल मडिवाळ, अशोक शांडगे, प्रकाश सप्तसागर यांच्यासह पोलिसांनी ही कारवाई केली.

हारुगेरी पोलिस याबाबत अधिक चौकशी करीत आहेत.