पंढरपूर : देगाव रस्त्यावरील फिश मार्केटमध्ये मच्छीमार संदीप भाऊसिंग भोई यांनी शुक्रवारी (ता. 20) दुर्मिळ आहेर मासा विक्रीसाठी आणला. या माशाला तब्बल एक हजार रुपये प्रतिकिलो दर मिळाल्याने फिश मार्केट परिसरात हा चर्चेचा विषय ठरला आहे. 

हे ही वाचा... उजनी धरणात गुदमरतोय माशांचा जीव

फिश मार्केटमध्ये मरळ, वाम, कटला, राहू, चिलापी, पंकज, बोदवा, कटारणी, गुगळी, शिंगाडा अशा प्रजातींच्या माशांसह खेकडेही मोठ्या प्रमाणावर विक्रीसाठी येतात. मात्र आहेर मासा दुर्मिळ असून मच्छीमारांना हा क्वचितच सापडतो. आज मार्केटमध्ये आहेर माशाची एक जोडी विक्रीसाठी आणल्याचे दिसून आले. 

हे ही वाचा... शिक्षकांना लवकरच मिळणार `ही` सुविधा

या संदर्भात भाऊसिंग भोई म्हणाले, बेगमपूर (ता. मंगळवेढा) येथील भीमा नदीच्या डोहात हा मासा सापडला आहे. येथील डोहात खडकाळ भाग आहे. त्यामुळे या प्रजातीच्या माशाला खाण्यासाठी भरपूर खाद्य व लपण्यासाठी योग्य जागा मिळते. त्या परिसरात आम्ही आहेर जातीचे दोन मासे गळाने पकडले. एक सव्वाकिलो तर दुसरा एक किलोचा आहे. सव्वा किलोचा मासा देगाव येथील महेश घाडगे यांनी एक हजार रुपये प्रतीकिलोप्रमाणे एक हजार 250 रुपयांना खरेदी केला.

आहेर माशाप्रमाणेच इतर माशांचे दरही आज चढेच आहेत. या संदर्भात देगाव फिश मार्केट मासे विक्रेते संघटनेचे अध्यक्ष किसन भोई म्हणाले, थंडीमुळे मासे सापडण्याचे प्रमाण घटले आहे. त्यामुळे मार्केटला माशांची आवक कमी होत आहे. म्हणूनच माशांचे दर वाढले आहेत. 

... म्हणून मासा खरेदी केला
आहेर मासा हा अंत्यत चविष्ट असून औषधी गुणधर्म असलेला आहे असे मानले जाते. त्यामुळे इतर माशांपेक्षा महाग असूनही मी हा मासा आवर्जून खरेदी केला आहे. 
- महेश अर्जुन घाडगे, देगाव (ता. पंढरपूर)