सांगली - एसटी महामंडळाच्या खासगीकरणाविरुद्ध मोट बांधण्याचे काम सुरू झाले आहे. त्यासाठीच बुधवारी (ता. २२) येथील कष्टकऱ्यांची दौलत इमारतीत व्यापक बैठक बोलावण्यात आली आहे. धनाजी गुरव, विकास मगदूम यांनी ही माहिती दिली.

ते म्हणाले, ‘‘राबणाऱ्या बहुजन समाजाने लढून शिक्षणाचा हक्क मिळवला. स्त्रिया शिकत आहेत. महाराष्ट्रात एसटीने शिक्षण गावागावात पोहचवले. अनेक शिक्षण संस्था निघाल्या. मुली शिकायला लागल्या. बाजार, जत्रा, एमआयडीसी बसच्या माफक दर, पास, सवलत यामुळे भरभराट झाली. हा विकासाचा सर्व खर्च जनतेच्या घामातून होत आला आहे. आतापर्यंत जनतेने घडवलेली, वाढवलेली एसटी काही भांडवलदारांच्या घशात घालण्याचे डावपेच चालले आहेत. एसटीचे खाजगकरण झाले तर मुलींचे आणि ग्रामीण भागातील मुलांचे शिक्षण बंद होईल. अनेक शिक्षण संस्था बंद पडतील. सगळ्यावरच परिणाम होईल. रोजगार मिळणार नाही. बेरोजगारी वाढेल. केंद्र आणि राज्य सरकारच्या खाजगकरणाच्या धोरणाने राबणारा बहुजन समाज नव्या गुलामगिरीत जाईल.’’

ते म्हणाले, ‘‘आम्ही विद्रोही सांस्कृतिक चळवळ आणि मित्र संघटना मिळून सरकारच्या या निर्णयाच्या विरोधात निर्णायक आंदोलनं उभे करणार आहोत. त्याच्या नियोजनासाठी कार्यकर्त्यांची मीटिंग बोलावण्यात आली आहे. ही बैठक बुधवारी दुपारी २ वाजता होईल. बहुजनांचे शिक्षण, रोजगार आणि विकासाबद्दल विचार करणाऱ्या सर्व चळवळीनी हजर राहावे.’’