सोलापूर, ता. 11 : वेगमर्यादेचे उल्लंघन केल्यास दंडाची पावती घरपोच मिळणार आहे. अपघातांचे प्रमाण कमी करण्याच्या उद्देशाने पोलिसांकडून येत्या 18 नोव्हेंबरपासून विशेष अभियान राबविण्यात येणार आहे. 
रस्ता सुरक्षा समितीने 2020पर्यंत प्राणांतिक अपघाताचे प्रमाण 50 टक्के कमी करण्याच्या उद्देशाने महत्त्वाचा निर्णय घेतला आहे. भरधाव वेगाने वाहन चालवणे, मद्य प्राशन करून वाहन चालविणे, हेल्मेट न वापरणे, सीटबेल्ट न वापरणे आदींमुळे अपघातांचे प्रमाण वाढले आहे. वाहतुकीच्या नियमांचे उल्लंघन करणाऱ्या वाहनचालकांवर प्रभावीपणे कारवाई करण्यासाठी सोलापूर ग्रामीण पोलिस दलास अत्याधुनिक साधनसामग्री असणारे वाहन अप्पर पोलिस महासंचालकांकडून देण्यात आले आहे. या विशेष वाहनामध्ये भरधाव वाहनाची वेगमर्यादा मोजण्यासाठीची यंत्रणा, ब्रिथ ऍनालायझर यासह इतर सुविधा उपलब्ध असणार आहेत. 
18 नोव्हेंबरपासून महामार्गावर अत्याधुनिक यंत्रणेसह कारवाईसाठी विशेष अभियान राबविण्यात येणार आहे. वेगमर्यादेचे उल्लंघन केल्यास संबंधित वाहनमालकास घरपोच नोटीस पाठविली जाणार आहे. तसेच त्यांच्या मोबाईल क्रमांकावर संदेशही जाणार आहे. अनेक लोक त्यांच्या वाहनाच्या काचेला डार्क ग्लास लावतात. त्या ग्लासची जाडी मोजण्याचे मशिनही या वाहनामध्ये उपलब्ध असणार आहे. अशा वाहनांना तपासणी करून जागेवरच दंडाची नोटीस देण्यात येणार आहे. मद्य प्राशन करून वाहन चालविणाऱ्या वाहनचालकाविरुद्ध दंडात्मक कारवाई करण्यात येणार आहे. 
-- 
पोलिसांना उपलब्ध झालेल्या नव्या अत्याधुनिक यंत्रणेच्या माध्यमातून 100 मीटर परिसरात वेगमर्यादा ओलांडणाऱ्या वाहनाचा क्रमांक कॅप्चर केला जाणार आहे. हा क्रमांक कंट्रोल रूमकडे जाईल. तेथून संबंधित वाहनमालकास दंडाची नोटीस घरपोच पाठविली जाणार आहे. वाहतूक नियमांचे उल्लंघन करणाऱ्यांवर कारवाईला गती मिळणार आहे. 
- अतुल झेंडे, 
अप्पर पोलिस अधीक्षक