मिरज : नोकरीनिमित्त नियमित रेल्वेने प्रवास करणा-यांची आता रोज आरक्षित तिकीट काढण्याच्या त्रासातून सुटका होणार आहे. मध्य रेल्वेकडून लवकरच रेल्वे प्रवास करणा-या प्रवाशांना पास मिळणार आहे. वैद्यकीय उपचारामुळे लस न घेतलेल्या प्रवाशांनादेखील पास दिला जाणार आहे. पण वैद्यकीय उपचाराचे पुरावे रेल्वे प्रशासनाकडे सादर करावे लागणार आहेत. १८ वर्षाखालील विद्यार्थ्यांना लस न घेतल्यामुळे पास मिळणार नाही. राज्यशासनाकडून सध्या काही जाचक अटींवर राज्यातील पॅसेंजर रेल्वे सेवा सुरू होण्याची शक्यता आहे.

सध्या कोरोना संसर्गाची तीव्रता कमी झाली आहे. मुंबईतील लोकल सेवा राज्य शासनाच्या परवानगीने काही आटींच्या अधिन राहून सुरू करण्यात आली. या पार्श्वभूमीवर येत्या काही महिन्यात पॅसेंजर सुरू करण्याच्या दृष्‍टीकोनातून राज्य प्रशासनाकडून नियोजन सुरू आहे. त्याचा एक भाग म्हणजे पास धारकांना प्रवासाची मुभा देण्यात आली आहे. लशीचे दोन डोस घेतले असणे सक्तीचे करण्यात आले आहेत. लस घेतल्यानंतर चौदा दिवसांच्या कालावधीनंतरच पास मिळणार आहे.

"राज्यसरकारच्या आदेशान्वये लशीचे दोन डोस घेतलेल्या जुन्या प्रवाशांना आणि नव्याने लस घेतलेल्या तसेच चौदा दिवसांचा कालावधी पूर्ण झालेल्या प्रवाशांना पास देण्याची प्रक्रिया पुणे स्थानकात सुरू आहे. लोकल, एक्स्प्रेसने प्रवास करणा-या प्रवाशांना नक्कीच लाभ होणार आहे."

- मनोज झंवर, जनसंपर्क अधिकारी, पुणे

"पुणे रेल्वे विभागास राज्य शासनाकडून प्राप्त परिपत्रकावरून लवकरच पॅसेंजर रेल्वे सुरू होण्याची शक्यता निर्माण झाली आहे. मात्र या परिपत्रकात लस घेतली असणे बंधनकारक करण्यात आल्याचे आदेश दिले आहेत."

- किशोर भोरावत, रेल्वे प्रवासी सेना, मिरज