कोल्हापूर - बॅंक खाते हॅक करून ठकसेनाने निवृत्त शिक्षकाला २३ लाख ४८ हजारांचा ऑनलाईन गंडा घातल्याचा धक्कादायक प्रकार उघडकीस आला. सायबर पोलिस ठाण्यात याची नोंद झाली. याबाबतची फिर्याद शिवगोंडा भीमगोंडा पाटील (रा. उजळाईवाडी, करवीर) यांनी दिली. 

पोलिसांनी दिलेली माहिती अशी

 निवृत्त शिक्षक शिवगोंडा पाटील उजळाईवाडी येथे राहतात. त्यांचे एका राष्ट्रीय बॅंकेत खाते आहे. भामट्याने त्यांच्याशी मोबाईलवर संपर्क केला. त्याने आपण संबंधित बॅंकेतून बोलत असल्याचे सांगितले. ‘तुमचे बॅंक खाते बंद (डिॲक्‍टिव्हेट) झाले आहे. ते सुरू करण्यासाठी मोबाईलवर एक लिंक पाठवतो’ असे सांगितले. त्यानुसार त्यांच्या मोबाईलवर त्याने लिंक पाठवली. या लिंकवर त्यांनी क्‍लिक केली. तशी त्यात नावासह बॅंक खात्याबाबतची सर्व गोपनीय माहिती भरा, असे सांगण्यात आले होते. त्यानुसार पाटील यांनी ती माहिती भरण्यास सुरवात केली. ठकसेन ती माहिती ऑनलाईन पाहात होता. त्याआधारे पाटील यांचे त्याने बॅंक खाते हॅक केले. त्यानंतर आलेला ओटीपी त्यांना विचारून घेतला. त्याधारे भामट्याने ७ ते ९ डिसेंबर अखेर पाटील यांच्या बॅंक खात्यातून तब्बल २३ लाख ४८ हजारांची रोकड ऑनलाईन काढून घेतली.

हेही वाचा - अबब ! मटक्‍यातून जमवली एक हजार कोटींची प्रॉपर्टी

मोबाईल क्रमांकावरून ठकसेनाचा शोध सुरू

हा प्रकार पाटील यांच्या लक्षात आला. त्यांनी बॅंकेशी संपर्क साधून थेट पोलिस मुख्यालयातील सायबर पोलिस ठाण्याशी संपर्क साधला. पोलिसांनी त्यांची फिर्याद नोंदवून घेऊन संबंधित मोबाईल क्रमांकाद्वारे ठकसेनाचा शोध सुरू केला. याबाबत तपास पोलिस निरीक्षक संजय मोरे आणि सहायक पोलिस निरीक्षक मंगेश देसाई करीत आहेत.

हेही वाचा - धक्कादायक ! चोर सोडून संन्याशाला बेड्या

फसव्या कॉलपासून सावध राहा

आपले कार्ड ब्लॉक झाले आहे. बॅंक खात्याची तपासणी सुरू आहे, डेबिट कार्ड क्रमांक, पिन कोड, ओटीपीची मागणी मोबाईलवरून करणाऱ्यांविरोधात नागरिकांनी वेळीच तक्रार द्यावी, असे आवाहन सायबर पोलिस ठाण्याचे निरीक्षक संजय मोरे यांनी केले आहे.