कोल्हापूर : गुजरी परिसरातील महालक्ष्मी ज्वेलर्स व जोतिबा रस्त्यावरील कोल्हेकर (देसाई) ज्वेलर्स ही दोन सराफ दुकाने चोरट्यांनी फोडली. त्यातील सुमारे साठ तोळे सोन्याचे दागिने व दहा किलो चांदीचे दागिने असा सुमारे 22 लाखांचा ऐवज लुटारूंनी लंपास केला. लुटारू सीसीटीव्ही कॅमेरात कैद झाले. 

गजबजलेल्या परिसरात पहाटे घडलेल्या या प्रकारामुळे पोलिस यंत्रणा खडबडुन जागी झाली. गुजरी ते गंगावेश रोडवर संतोष दिनकर शेळके (रा. फुलेवाडी) यांचे महालक्ष्मी ज्वेलर्स हे दुकान आहे. या दुकानाचे कडी कोयंडा चोरट्यांनी उचकटुन आत प्रवेश केला. अवघ्या पंधरा मिनिटांत दुकानातील ड्रॉवर उचकटुन सुमारे 70 ते 80 ग्रॅम सोन्याचे दागिने, चार किलो चांदीचे दागिने व 66 हजारांची रोकड लंपास केली. 

जोतिबा रोडवर असलेल्या प्रमोद कल्लाप्पा कोलेकर (देसाई) यांचे सराफ दुकान आहे. या दुकानात पहाटे साडे चारच्या सुमारास तीन चोरटे मोटारीतून आले. त्यांनी शटरच्या पट्ट्या उचकटून आत प्रवेश केल्या. सुमारे पन्नास तोळे सोन्याचे दागिने आणि चार ते पाच किलो चांदीचे दागिने लंपास केले. याच दुकानातील सात ते आठ तोळे दागिने असलेली तिजोरीही पळवून नेली. सायरन वाजत असतानाही त्यांनी हे कृत्य केले. सकाळी दहाच्या सुमारास हे दोन्ही प्रकार उघडकीस आले. घटनास्थळी शहर पोलिस उपअधिक्षक डॉ. प्रशांत अमृतकर, जुना राजवाड्यातील पोलिस निरीक्षक मानसिंग खोचे, शाहुपुरीचे संजय मोरे, राजरामपुरीचे संभाजी म्हेत्रे, लक्ष्मीपुरीचे वसंत बाबर, स्थानिक गुन्हे अन्वेषण शाखेचे पोलिस दाखल झाले असून लुटारूंचा शोध सुरू केला आहे.