नगर : महानेट प्रकल्पामार्फत ग्रामपंचायतींना इंटरनेट जोडणी दिली जात आहे. या कामादरम्यान नगर तालुक्‍यात अनेक रस्ते खोदण्यात आले. या प्रकरणी पंचायत समितीने गुन्हा दाखल करण्याचा ठराव केला. त्यानंतर महानेट प्रकल्पाच्या ठेकेदाराने सर्व खोदलेल्या रस्त्यांची दुरुस्ती करून देऊ, असे पंचायत समितीच्या मासिक बैठकीत सांगितल्याने गुन्हा दाखल करण्याची प्रक्रिया थांबविण्यात आली आहे. 

राज्यातील 13 हजार ग्रामपंचायतींना उच्च क्षमतेची इंटरनेट जोडणी "महानेट' (भारत नेट- दुसरा टप्पा) प्रकल्पामार्फत उपलब्ध करून देण्यात येत आहे. महानेटच्या जोडणीसाठी नगर तालुक्‍यातील पारगाव (भातोडी), सोनेवाडी, पिंपळगाव लांडगा आदी गावांत तीन किलोमीटरचे रस्ते खोदले आहेत. 

हेही वाचा - दहावी परीक्षेच्या तयारीसाठी विद्यार्थ्यांना मार्गदर्शन 

याबाबत "महानेट'ने पंचायत समितीला, तसेच जिल्हा परिषदेला कोणतीच पूर्वकल्पना दिली नव्हती. त्यामुळे नगर पंचायत समितीचे सभापती रामदास भोर यांच्या अध्यक्षतेखाली झालेल्या मासिक सभेत "महानेट'वर गुन्हा दाखल करण्याचा ठराव झाला होता. त्यानंतर महानेट प्रकल्पाच्या ठेकेदाराने नगर पंचायत समितीशी संपर्क केला. बुधवारी (ता. पाच) पंचायत समितीची बैठक झाली. बैठकीत महानेटच्या ठेकेदाराने उपस्थित राहून तालुक्‍यातील सर्व रस्त्यांची तातडीने दुरुस्ती करून देऊ, असे सांगितले. पण हे काम करताना डांबर उपलब्ध नसल्याने आम्ही खोदलेल्या ठिकाणी सिमेंटचा रस्ता तयार करून देऊ, असे सांगितले. खोदलेले रस्ते दुरुस्त होत असल्यामुळे मासिक सभेत महानेटवर गुन्हा दाखल न करण्याचा निर्णय सर्वानुमते घेण्यात आला. 

खोदलेल्या रस्त्यांची दुरुस्ती होणे हा आमचा मूळ उद्देश होता. तो सफल झाल्यामुळे आम्ही गुन्हा दाखल न करण्याचा निर्णय घेतलेला आहे. 
- रामदास भोर, सभापती, नगर पंचायत समिती