सांगली: रशिया-युक्रेन युद्धाचा प्रत्यक्ष व अप्रत्यक्ष परिणाम काही गोष्टींवर झालेला पाहायला मिळत आहे. युद्धाचा परिणाम म्हणून स्टीलचा दर प्रतिटन ८८ हजार ६०० (जीएसटीसह) रुपये इतका झाला आहे. आजवरचा हा उच्चांकी दर मानला जात आहे. दोन ते तीन आठवड्यात प्रति टन तब्बल २० हजार रुपये वाढ झाली आहे. सध्या स्टीलचा तुटवडाही जाणवू लागलाय. त्यामुळे बांधकाम क्षेत्रावर संकट ओढवले आहे.

रशिया-युक्रेनमध्ये काही दिवसांपासून युद्ध सुरू आहे. युद्धाची झळ विविध क्षेत्रांना जाणवू लागलीय. युद्धामुळे स्टीलच्या दरात भरमसाट वाढ झाल्याचे चित्र पाहायला मिळत आहे. युक्रेन हा मॅग्निज लोहखनिज निर्यात करणारा प्रमुख देश मानला जातो. युद्धामुळे कच्च्या मालाची आवक थांबली आहे. त्यामुळे स्टील उत्पादक कंपन्यांना कच्चा माल मिळणे अवघड झाले. तसेच, युद्धामुळे झालेल्या अन्य गोष्टींच्या भाववाढीचा परिणामही स्टीलच्या दरावर झाला आहे.

दोन ते तीन आठवड्यांपूर्वी स्टीलचा दर ६८ हजार रुपये प्रतिटन होता. तो दर वाढत जाऊन सध्या ८८ हजार रुपये प्रतिटनापर्यंत पोहोचला आहे. ही वाढ आजवरची ऐतिहासिक म्हणावी लागेल. तशातच काही स्टील उत्पादक कंपन्याच्या उत्पादनावर परिणाम झाला आहे. त्यामुळे स्टीलचा तुटवडा भासत आहे. अशीच स्थिती राहिली तर स्टीलच्या दरात आणखी वाढ संभवते.

स्टील दरातील वाढीमुळे गेल्या काही दिवसांपासून मोठ्या बांधकामावर परिणाम जाणवत आहे. ज्यांनी महिन्यांपूर्वी स्टील खरेदी करून ठेवले आहे, त्यांना कोणती अडचण नाही. परंतु, नवीन स्टील खरेदी करणाऱ्या बांधकाम व्यावसायिक तसेच वैयक्तिक खरेदीदारांपुढे भाववाढीचे संकट उभे राहिले आहे. अनेक ठिकाणी स्टील दरातील वाढीमुळे बांधकामे थांबतील असे चित्र आहे. बांधकाम क्षेत्रात स्टीलला सर्वाधिक महत्त्व आहे. त्यावरच मोठी बांधकामे अवलंबून आहेत. त्यामुळे अनेकांना युद्धाचे ढग निवळण्याची प्रतीक्षा करावी लागेल.