उपळाई बुद्रूक (सोलापूर) : महाराष्ट्र लोकसेवा आयोगातर्फे घेण्यात आलेल्या विक्रीकर निरीक्षक मुख्य परीक्षेत माढा तालुक्‍यातील उपळाई खुर्द येथील विठ्ठल गणपत हराळे हा महाराष्ट्र राज्यात 10वा तर भटक्‍या विमुक्त प्रवर्गातून राज्यात प्रथम क्रमांकाने उत्तीर्ण होत घवघवीत यश संपादन केले आहे. 

हे ही वाचा... माझे पोलिस संरक्षण काढून घ्या

विठ्ठल यांचे प्राथमिक शिक्षण उपळाईच्या जिल्हा परिषद शाळेत तर माध्यमिक शिक्षण गावतीलच न्यू इंग्लिश स्कूलमध्ये व अकरावी, बारावी सातारा येथील रयत शिक्षण संस्थेच्या महाविद्यालयात झाले. उच्च माध्यमिक बीफार्मसीचे शिक्षण कराड येथे घेऊन एमएस फार्मचेही शिक्षण पूर्ण केले. विठ्ठल हराळे यांची घरची परिस्थिती अत्यंत बिकट. आई-वडील शेतमजुरी करून मुलांना शिक्षण देत होते. वडील कामावर असताना विजेच्या धक्‍क्‍याने मृत्यू झाला. त्यामुळे कुटुंबाचा सारा भार त्यांचे मोठे बंधू बिरुदेव हराळे यांच्यावर पडला.

हे ही वाचा... पंढरपूरचे बेदाणे उत्पादक खूष, का ते वाचा...

विठ्ठल हे शिक्षणात हुशार असल्याने त्यांना शिक्षण देण्यासाठी बंधू बिरुदेव यांनी शिक्षण सोडून काबाडकष्ट करत कुटुंबाचा गाडा हाकत भावाला शिक्षण दिले. घरच्या परिस्थितीची जाण ठेवत विठ्ठल यांनीही चांगल्या गुणवत्तेने उच्च शिक्षण पूर्ण केले. शिक्षण पूर्ण होताच गुणवत्तेच्या जोरावर त्यांना पुणे येथे सहायक प्राध्यापक म्हणून नोकरीही मिळाली. परंतु कुटुंबाची इच्छा प्रशासकीय अधिकारी व्हावे अशी असल्याने 2015 पासून त्यांनी स्पर्धा परीक्षेचा अभ्यास सुरू केला होता. काही वेळा यशाने हुलकावणी दिली. परंतु कष्ट, चिकाटी व आत्मविश्‍वासाच्या जोरावर त्यांनी राज्य लोकसेवा आयोगाच्या विक्रीकर निरीक्षक परीक्षेत राज्यात 10वा तर भटक्‍या विमुक्त प्रवर्गातून राज्यात पहिला येत घवघवीत यश संपादन केले. 

कष्ट केले की यश मिळतेच
अपयश ही यशाची पहिली पायरी आहे असं समजून वारंवार अपयश आले तरी देखील मी अधिकारी होणार, अशी मनाशी खूणगाठ बांधून प्रयत्न करत राहिलो. कष्ट केले की यश मिळतेच, याचा अनुभव आला. एवढ्यावरच न थांबता पुढे यापेक्षा मोठ्या पदावर विराजमान व्हायचे आहे. 
- विठ्ठल गणपत हराळे 
नूतन विक्रीकर निरीक्षक