बेळगाव : आचारसंहिता उल्लंघन आरोपाखाली दाखल गुन्ह्यात शिवप्रतिष्ठान हिंदूस्तानचे प्रमुख संभाजी भिडे (Sambhaji Bhide) गुरुजी यांना वॉरंट जारी झाला होता. त्यानुसार श्री भिडे गुरुजी मंगळवारी (ता.२८) बेळगाव प्रथमवर्ग न्यायदंडाधिकारी द्वितीय न्यायालयात (Court) हजर झाले.

भिडे गुरुजी यांच्या विरोधात बेळगाव ग्रामीण पोलिस ठाण्यात २०१८ मध्ये गुन्हा दाखल झाला आहे. दाव्याच्या सुनावणीला कोविड, लॉकडाऊन आणि कारणांनी त्यांना हजर होणे शक्य झाले नाही. यामुळे न्यायाधीशांनी त्यांना वॉरंट बजाविला होता. त्याप्रमाणे भिडे गुरुजी मंगळवारी उपस्थित राहिले. येळ्ळूर गावात ग्रामदेवता श्री चांगळेश्वरी देवी यात्रेनिमित्त १२ एप्रिल २०१८ रोजी येळ्ळूरमधील महाराष्ट्र मैदानावर कुस्ती स्पर्धा आयोजित करण्यात आली होती.

स्पर्धेचे उद्‍घाटन भिडे गुरुजी यांच्याहस्ते झाले. या दरम्यान विधानसभा निवडणूक कर्नाटक होती. महाराष्ट्र एकीकरण समिती उमेदवारांना विजयी करण्याबाबतचे आवाहन केले होते. महाराष्ट्र एकीकरण समिती उमेदवारांच्या विरोधातील उमेदवारांना त्यांची जागा दाखवावी, असे आवाहन केले. याला निवडणूक अधिकाऱ्यांनी आक्षेप घेत आचारसंहिता उल्लंघनाचा गुन्हा बेळगाव ग्रामीण पोलीस ठाण्यात नोंदविला.

भिडे गुरुजीसह शिवप्रतिष्ठान हिंदुस्थानचे जिल्हाध्यक्ष किरण गावडे, मारुती परशराम कुगजी (मयत), प्रदीप देसाई, डी. जी. पाटील, मधू पाटील, विलास मोनाप्पा नंदी, भोला उर्फ नागेंद्र पाखरे, दुद्दाप्पा बागेवाडी आणि लक्ष्मीकांत मोदगेकर यांच्यावर बेळगाव ग्रामीण ग्रामीण पोलीस स्थानकात गुन्हा नोंदविला. या दाव्याची मंगळवारी सुनावणी झाली आणि त्यात भिडे गुरुजी न्यायालयात हजर झाल्यामुळे वॉरंट मागे घेण्यात आला. दाव्याची पुढील सुनावणी २५ फेब्रुवारीला होणार आहे. शिवप्रतिष्ठाण हिंदूस्तानतर्फे अॅड. शामसुंदर पत्तार आणि ॲड. हेमराज बेंच्चण्णावर काम पाहत आहेत.