तासगाव - मांजर्डे (ता. तासगाव) येथे अजित बाबुराव साळुंखे, मांजर्डे आणि तानाजी शिवराम शिंदे, आरवडे या दोघांचा अज्ञाताने डोक्यात दगड घालून खून केल्याची घटना आज सकाळी उघडकीस आली. दोन वेगवेगळ्या ठिकाणी एकाच पद्धतीने झालेल्या या खुनामुळे पोलिस यंत्रणा कामाला लागली आहे.

याबाबत मिळालेली माहिती अशी की मांजर्डे गावच्या मध्यवर्ती ठिकाणी असलेल्या बसस्थानकामध्ये अजित साळुंखे यांचा तर तेथून ५० फूट अंतरावर तानाजी शिंदे यांचा रक्ताच्या थारोळ्यात पडलेले मृतदेह सकाळी ग्रामस्थाना दिसल्यानंतर तासगाव पोलिसांना या घटनेची माहिती देण्यात आली दोघांच्याही डोक्यात दगड घालण्यात आला होता. घटनास्थळी पोलीस निरीक्षक संजीवकुमार झाडे यांच्यासह पोलिस पथक घटनास्थळी दाखल झाले. स्थानिक गुन्हे अन्वेषण विभागाचे पथकही मांजर्डे येथे दाखल झाले.

दोन वेगवेगळ्या गावातील व्यक्तींचा एकाच पद्धतीने एकाच वेळी खून झाल्याने पोलिस चक्रावले आहेत. स्थानिक मिळालेल्या माहितीनुसार दोघेही मद्यपी असून काल रात्रीही उशिरापर्यंत दोघे एकत्र मद्यपान करत होते. त्यानंतर खून झाला असावा असा पोलिसांचा अंदाज आहे. पोलिसांनी मृतदेह उत्तरीय तपासणीसाठी तासगाव ग्रामीण रुग्णालयात पाठविले असून अधिक तपास तासगाव पोलिस करत आहेत.