कुपवाड: पुण्यश्लोक अहिल्यादेवी होळकर स्मारकाच्या लोकार्पण सोहळ्यावरून महापालिकेतील राष्ट्रवादी - कॉग्रेस विरुद्ध भाजप उफाळलेल्या वादाच्या पार्श्वभूमीवर आज कडेकोट बंद पुकारण्यात आला आहे.स्मारकाच्या दिशेने जाणारे सर्व मार्ग पोलिसांनी अडथळे उभारून रोकले आहेत.

महापालिका प्रभाग आठ परिसरातील अहिल्यादेवी यांच्या स्मारकाचा सोहळा येत्या 2 एप्रिलला राष्ट्रवादी काँग्रेस पक्षाचे अध्यक्ष शरद पवार यांच्या हस्ते होत आहे. त्याबाबतचा कार्यक्रम महापौरांसह राष्ट्रवादीच्या पदाधिकाऱ्यांकडून जाहीर करण्यात आला असून त्याच्या अगोदरच आज 27 मार्चला बहुजन समाजातील कार्यकर्त्यांच्या हस्ते स्मारकाचे उद्घाटन करणार असल्याची घोषणा भाजपने केली आहे. याबाबत आमदार गोपीचंद पडळकर यांनी आक्रमक भूमिका धारण करत आजच्या कार्यपूर्तीसाठी शड्डू ठोकला आहे.

निर्माण झालेली वादाची स्थिती पाहता प्राप्त झालेल्या अहवालानुसार जिल्हाधिकारी डॉ.अभिजित चौधरी यांनी येणाऱ्या 2 एप्रिल पर्यत स्मारक परिसरातील शंभर मिटर हद्दीत संचारबंदी लागू केली आहे. याच पार्श्वभूमीवर आज रविवारी पोलिस बंदोबस्त आणखी कडक करण्यात आला. गर्दी नियंत्रणासाठी राज्य राखीव दलाच्या दोन तुकड्या दाखल झाल्या आहेत. स्मारक परिसरात आज सकाळपासूनच पोलिस बंदोबस्त कडक करण्यात आला आहे. सूतगिरणीच्या दिशेने येणारी वाहने रस्त्या मधोमध अडथळा उभारून रोखण्यात आली आहेत. ठिकठिकाणी पोलिसांच्या तुकड्या बंदोबस्त बजावत आहेत. रस्त्यावरून जाणाऱ्या प्रवाशांची अडवणूक करून विचारपूस करण्याचे काम ते करताना ते आढळतात. केवळ पोलिस प्रशासनाची वाहतूक स्मारकस्थळी सुरू ठेवण्यात आली आहे. आजच्या सोहळ्याचा नियोजनाची सुरुवात ठीक चार वाजता सूतगिरणी चौकातून होणार असल्याने त्याकडे सर्वांचे लक्ष लागले आहे.