सांगली : बेडग (ता. मिरज) येथील कमान पाडल्याप्रकरणी दोन ग्रामसेवकांवर निलंबनाची कारवाई केली. ग्रामसेवक बी. एल. पाटील आणि ग्रामसेवक एम. एस. धेंडे अशी त्यांची नावे आहेत. निलंबनाचे आदेश जिल्हा परिषदेच्या मुख्य कार्यकारी अधिकारी तृप्ती धोडमिसे (Trupti Dhodmise) यांनी दिले.

बेडग येथील स्वागत कमान पाडल्याबाबत सुरेखा कल्लाप्पा कांबळे यांनी ५ जुलै रोजी प्रशासनास निवेदन दिले होते. त्यानंतर या प्रकरणाची चौकशी करण्यासाठी ग्रामपंचायत (Bedag Gram Panchayat) विभागाचे तत्कालीन उपमुख्य कार्यकारी अधिकारी तानाजी लोखंडे यांची चौकशी अधिकारी म्हणून नियुक्ती केली होती.

दरम्यान, लोखंडे यांच्यासह मिरजेचे गटविकास अधिकारी यांनी समक्ष भेट देऊन माहिती घेतली. त्यांनी ग्रामपंचायतीकडील कागदपत्रांची तपासणी केली होती. त्यात संबंधितांनी केलेली कारवाई ही ग्रामपंचायत अधिनियम १९५९ मधील कलम ५२ (२ अ) व ५३ (१) नियमानुसार सदोष आहे.

त्यामुळे सरपंच, सदस्य व ग्रामसेवकांना नोटीस दिली होती. सात दिवसांत खुलासा करण्याची सूचना केली होती. त्यानुसार ग्रामसेवकांनी खुलासा सादर केला आहे. मात्र, खुलासा समाधानकारक नसल्याने ही कारवाई केली.

ग्रामसेवकाची उच्च न्यायालयात धाव

जिल्हा परिषदेच्या कारणे दाखवा नोटिशीविरोधात ग्रामसेवक बी. एल. पाटील यांनी उच्च न्यायालयात धाव घेत दावा दाखल केला आहे. त्यात कोणतीही कारवाई करण्यास विरोध दर्शविला आहे. उच्च न्यायालयात दावा दाखल केलेला असल्याने ग्रामसेवकावर कोणतीही कारवाई करू नये, असे नोटिशीत म्हटले आहे. जिल्हा परिषदेच्या मुख्य कार्यकारी अधिकारी, उपमुख्य कार्यकारी अधिकारी, गटविकास अधिकारी, विस्ताराधिकारी आणि बेडग ग्रामपंचायतीला या नोटिशीच्या प्रती पाठवल्या आहेत.