सांगली - कॉंग्रेसने मोदी सरकारवर हल्लाबोल करण्यासाठी थेट राज ठाकरे यांच्या व्यंगचित्राची मदत घेतली आहे. राज यांच्या कुंचल्यातून नीरव मोदी बॅंक घोटाळा प्रकरणी लक्षवेधी व्यंगचित्र साकारले होते. ते कॉंग्रेसने डिजीटल फलकावर वापरले असून तो फलक सांगलीत कॉंग्रेसच्या कार्यकर्ता मार्गदर्शन शिबिरात झळकला. विशेष म्हणजे या मेळाव्याला कॉंग्रेसचे दोन माजी मुख्यमंत्री हजर होते. 

मनसेचे अध्यक्ष राज ठाकरे सध्या भाषण आणि व्यंगचित्रांच्या माध्यमातून मोदी सरकारवर हल्लाबोल करताहेत. राज हे प्रसिद्ध व्यंगचित्रकारही आहेत. मोदी सरकारच्या काळातील विविध घोटाळे, भाजप नेत्यांची वादग्रस्त वक्तव्ये यावर त्यांनी जोरदार फटकारे मारले आहेत. त्यातील नीरव मोदीच्या बॅंक घोटाळ्याची फार चर्चा झाली. अकरा हजार कोटींचा हा घोटाळा करून नीरव मोदी पसार झाला. पंतप्रधान मोदी यांनी लोकसभेच्या प्रचारावेळी "मला प्रधानमंत्री नव्हे तर चौकीदार करा', असे आवाहन केले होते. नेमका त्या मुद्याला हात घालत राज यांनी व्यंगचित्र रेखाटलेले आहे. ते चांगलेच चर्चेत आले, गाजले होते. 

कॉंग्रेसने आजच्या शिबिरासाठी वेगवेगळ्या व्यंगचित्रांचे डिजीटल फलक करून सभागृहात लावले होते. त्यापैकी एक डिजीटलसाठी थेट राज यांच्या व्यंगचित्राची मदत झाली आणि सभागृहात तेच लक्षवेधी होते. राज भविष्यात भाजपला विरोध करताना कॉंग्रेसला "हात' देतील की नाही, सांगता यायचे नाही, मात्र कॉंग्रेसने मात्र त्यांचा व्यंगचित्राचा "हात' मदतीला घेतला आहे.