सांगली -  लूटमार प्रकरणी संशयित म्हणून पकडलेल्या तरूणाला पोलिसांनी थर्ड डिग्री वापरली. त्याता त्याचा पोलिस ठाण्यातच मृत्यू झाला. प्रकरण अंगलट येते आहे समजून त्याचा मृतदेह अंबोलीजवळ जाळण्यात आला. या प्रकरणी अटक झालेल्या हैवान सहाय्यक पोलिस निरीक्षक युवराज कामटेसह पाच जणांना आज न्यायालयात हजर करण्यात आले. त्यावेळी न्यायाधिशांनी सर्वाना पोलिस कोठडीचा आदेश दिला. उपनिरीक्षक कामटेसह अरुण टोणे, नसरुद्दीन मुल्ला, राहुल शिंगटे आणि झिरो पोलिस झाकीर पट्टेवालेचा समावेश आहे. 

पोलिस अनिल लाडला मात्र तपास कामासाठी पोलिसांनी ताब्यात ठेवल्याने न्यायालयात हजर केले नव्हते. मुख्य न्यायदंडाधिकारी पी. पी. खापे यांनी सर्वांना 13 दिवसांची पोलिस कोठडी सुनावली. दरम्यान, आज दुपारी दीडच्या सुमारास या सर्वांना न्यायालयात आणणार असल्याने कडेकोट बंदोबस्त ठेवला होता. 

याबाबतची माहिती अशी, की कोल्हापूर रस्त्यावर सांगली आकाशवाणीजवळ एका अभियंत्याला चाकूचा धाक दाखवून त्याच्याकडून दोन हजार रुपये आणि मोबाईलची लूट केल्याप्रकरणी शहर पोलिसांनी संशयित म्हणून अनिकेत कोथळे (वय 23) आणि अमोल भंडारे (26, दोघे भारतनगर, कोल्हापूर रस्ता, सांगली) यांना दोन दिवसांपूर्वी अटक केली. दोघांना सोमवारी (ता. 6) रात्री चौकशीसाठी बाहेर काढल्यावर दोघेही पळाले, असा पोलिसांनी प्रथम बनाव रचला. अनिकेत कोथळेच्या कुटुंबीयांना अनिकेतच्या घातपाताची शंका आल्याने प्रकरण तापले. मंगळवारी शहरात तणाव निर्माण झाला. पोलिसांनी उडवाउडवीची उत्तरे दिल्याने त्यात भर पडली. त्याच दिवशी रात्री या गंभीर घटनेचा पर्दाफाश करण्यात आला. त्यातून धक्कादायक प्रकार उघडकीस आला. 

उपनिरीक्षक युवराज कामटेसह अनिल लाड, अरुण टोणे, नसरुद्दीन मुल्ला, राहुल शिंगटे आणि झिरो पोलिस झाकीर पट्टेवाले यांना या प्रकरणी अटक करण्यात आली आहे. त्यानी गुन्ह्याची कबुली दिली आहे. खून करुन त्याचा मृतदेह सिंधुदुर्ग जिल्ह्यातील आंबोली येथे नेऊन एकदा नव्हे दोनदा जाळण्यात आला. त्यानंतर या हैवानांचा प्रताप समोर आला. कामटेसह साऱ्यांना न्यायालयात हजर केले असता त्यांना 13 दिवसांची पोलिस कोठडी मिळाली. सरकार पक्षातर्फे उज्ज्वला आवटे यांनी पोलिस कोठडीची मागणी केली. न्यायदंडाधिकारी पी. पी. खापे यांनी आदेश दिला.