सांगली - मलेशियात हॉटेलमध्ये मॅनेजरची नोकरी मिळवून देण्याचे आमिष दाखवून तरुणांची फसवणूक करणाऱ्या पोलिसपुत्र कौस्तुभ पवारच्या घराची पोलिसांनी झडती घेतली; पण तेथे काही महत्त्वाचे सापडले नाही. त्याचे बॅंक खाते गोठवण्यात आले. त्याने आणखी काहीजणांची फसवणूक केली आहे का, याचा कसून शोध पोलिस घेत आहेत.

याबाबत पोलिसांनी दिलेली माहिती अशी - कुपवाडमधील कौस्तुभला पोलिसांनी बुधवारी अटक केली. न्यायालयाने पोलिस कोठडीत ठेवण्याचा आदेश काल दिला. त्याने मलेशियात हॉटेल मॅनेजर म्हणून नोकरी लावण्याचे  आमिष दाखवून गुरुनाथ कुंभार, मोहन शिंदे, दीपक माने आणि सदानंद धनगर यांची फसवणूक केली आहे. त्याने आणखी काही तरुणांची फसवणूक केली आहे का याचा शोध सुरू आहे. त्यासाठी कौस्तुभच्या कुपवाडमधील घराची झडती घेतली. 

कौस्तुभने फसवणूक केलेल्या तरुणांकडून दीड ते अडीच लाखांपर्यंत रक्कम उकळली. त्यांना वर्क व्हिसा दिला नाही. ट्रॅव्हल व्हिसा संपल्यानंतरही त्यांच्याकडे वर्क व्हिसा नसल्याने मलेशियाच्या पोलिसांनी त्यांना अटक केली. न्यायालयाने त्यांना तीन महिने कारावासाची शिक्षा सुनावली. 

कौस्तुभवर कारवाई करताना पोलिसांनी त्याच्या बॅंक खात्याची तपासणी केली. त्यात फार मोठी रक्कम  आढळून आली नाही. एका बॅंकेत त्याचे खाते असून तो तरुणांकडून रोख रकमेसह धनादेशाद्वारेही पैसे स्वीकारत असे. ते पैसे त्याच्या बॅंक खात्यात जमा होत. त्याने प्रकरण उघडकीस आल्यानंतर गायब होऊन बॅंक खात्यातील पैसे काढून घेतले आहेत.
धीरजचा कसून शोध 

कौस्तुभचा सहकारी धीरज पाटील अजूनही गायब आहे. त्याचा कसून शोध घेण्यात येत आहे. कौस्तुभकडून त्याची माहिती मिळवण्याचा प्रयत्न केला जात आहे, असे पोलिसांनी सांगितले.