सांगली : येथील कर्मवीर चौकाजवळ काल रात्री अकराच्या सुमारास मुंबईकडे निघालेल्या अशोका ट्रॅव्हल्सच्या आरामबस चालकाचा ताबा सुटल्यामुळे रस्ता सोडून बस झाडावर आदळली. सुदैवाने कोणतीही जिवीतहानी झाली नाही. चालकाच्या केबिनमध्ये वटवाघूळ घुसल्यामुळे अपघात झाल्याची चर्चा सुरु होती.

अशोका ट्रॅव्हल्सची बस (एमएच 09 जीजे 5454) रात्री मुंबईकडे निघाली होती. कर्मवीर चौकाजवळ जिल्हा बॅंकेसमोर हा अपघात झाला. अपघातानंतर घटनास्थळी नागरिकांची गर्दी जमली होती. आतील प्रवाशांना सुखरुप बाहेर काढले. आतील प्रवाशापैकी एकजण जखमी झाला. उर्वरीत प्रवासी किरकोळ जखमी झाले. विश्रामबाग पोलिसही माहिती मिळताच तत्काळ घटनास्थळी आले. त्यांनी तत्काळ गर्दी हटवली. मध्यरात्रीनंतर कलंडलेली बस बाहेर काढण्याचे प्रयत्न सुरु होते.