सांगली - सांगली कृषी उत्पन्न बाजार समिती निवडणुकीसाठी महाविकास आघाडी आणि भारतीय जनता पक्षाच्या पॅनेलमधील उमेदवारांची यादी जाहीर करण्यात आली. त्यानंतर भाजपच्या पॅनेलमध्ये अचानक खळबळ उडाली.

जागावाटपावरून खासदार संजय पाटील आणि जतचे माजी आमदार विलासराव जगताप यांच्यात मोठा वाद निर्माण झाला.

जत सोसायटी गटातील उमेदवाराचे नाव परस्पर बदलल्याने संतप्त झालेल्या जगताप यांनी नाराजी व्यक्त करीत भाजप पॅनेलमधून बाहेर पडण्याचा निर्णय घेतला.

दुसरीकडे, काँग्रेसमध्येही मिरज तालुक्यातील उमेदवार बदलल्याने नाराजीचा सूर उमटला. दोन्ही पॅनेलमध्ये नाराजी निर्माण झाल्याने तर्क-वितर्क लढविले जात आहेत.

सांगली कृषी उत्पन्न बाजार समितीसाठी २८ एप्रिलला मतदान होत आहे. यासाठी काँग्रेस, राष्ट्रवादी काँग्रेस व शिवसेना (ठाकरे गट) यांच्या महाविकास आघाडीचे वसंतदादा पाटील शेतकरी विकास पॅनेल, विरोधी भाजपचे शेतकरी परिवर्तन पॅनेल, तर तिसरी आघाडी अशी निवडणूक होत आहे.

खरी लढत महाविकास आघाडी व भाजपमध्ये होईल. बाजार समितीच्या निवडणुकीसाठी भाजप आणि महाविकास आघाडीच्या उमेदवारांच्या याद्या आज जाहीर करण्यात आल्या. यात जत तालुक्यातून भाजप पॅनेलचे नेते खासदार पाटील व जिल्हा बँकेचे संचालक प्रकाश जमदाडे यांनी काँग्रेस व ‘राष्ट्रवादी’ला जबर धक्का दिला. या दोन्ही पक्षांच्या दोन प्रमुख कार्यकर्त्यांना उमेदवारी दिली आहे.

महाविकास आघाडी आणि भाजप पॅनेलच्या उमेदवारांची नावे आज प्रसिद्ध करण्यात आली. यादीनंतर भाजपमध्ये मोठी खळबळ उडाली. जतचे माजी आमदार विलासराव जगताप यांनी,

सोसायटी गटातून भाजप जत अध्यक्ष प्रमोद सावंत यांचे नाव खासदार पाटील आणि प्रकाश जमदाडे यांच्या गटाने परस्पर बदलून त्याठिकाणी बिळूर गटातील चिदानंद चौगुले यांना उमेदवारी दिली. यादीत बदल केल्याची माहिती समजताच जगताप यांनी संताप व्यक्त करीत भाजप पॅनेलमधून बाहेर पडत असल्याचे जाहीर केले.