भिलार : रांजणी व वहागाव (ता. जावळी) या गावांच्या परिसरात बिबट्याचा वावर वाढला असून, नागरिकांमध्ये घबराटीचे वातावरण पसरले आहे. दोन दिवसांपूर्वी वहागाव येथे बिबट्याने एका कुत्र्यावर हल्ला चढवत त्याचा प्राण घेतला. यामुळे "कोरोना'घरातून बाहेर पडू देईना आणि बिबट्या भीतीने घरात बसू देईना, अशी विचित्र अवस्था नागरिकांची झाली आहे. 

याबाबत अधिक माहिती अशी की रांजणी, वहागाव, राघववाडी या गावांत गेल्या काही दिवसांपासून बिबट्याचा वावर सुरू असल्याचे ग्रामस्थांमध्ये बोलले जात असून, काल वहागाव येथील नथुराम कांबळे यांच्या पाळीव कुत्र्यावर रात्रीच्या वेळी बिबट्याने हल्ला चढवला. त्यात बिबट्याने कुत्र्याच्या नरडीचा घोट घेऊन त्याचा प्राण घेतला. त्यामुळे गावातील नागरिकांमध्ये भीतीचे वातावरण पसरले आहे. सध्या कोरोनामुळे संचारबंदी असल्याने लोकांना घराबाहेर पडणेही मुश्‍किल झाले असताना बिबट्याच्या संचाराने आणखीन भीती निर्माण झाली आहे.

वहागाव, रांजणी आणि राघववाडी ही महू धरणात पूर्णपणे विस्थापित झालेली गावे आहेत. त्यामुळे बहुतांश लोक विस्थापित होऊन इतरत्र गेलेले आहेत. त्यामुळे वहागावमध्ये अत्यल्प लोक वास्तव्य करत आहेत. या तुटपुंज्या ग्रामस्थांमध्ये बिबट्याने प्रचंड दहशत निर्माण केली आहे. काल रात्री गावाच्या मुख्य वस्तीत असणाऱ्या वहागावच्या मंदिरापासून बिबट्या खाली धरणाच्या दिशेने जाताना पाहिला असल्याची चर्चा सुरू आहे. रात्रीत लोक बिबट्याच्या भीतीने झोपतही नाहीत. त्यामुळे या बिबट्याचा बंदोबस्त वन विभागाने करावा, अशी मागणी ग्रामस्थांनी केली आहे. 

लावणी सम्राज्ञी सुरेखा पुणेकरांची उद्धव सरकारपुढे आर्त हाक

फक्त एका फाेनवर ज्येष्ठांना आणि दिव्यांगांना मिळणार घरपोच पेन्शन 

आमच्या गावच्या पेंढा नावाच्या शिवारातून हा बिबट्या गावात प्रवेश करत असून, परवा कुत्र्याचा फडशा पाडल्यानंतर नागरिक भीतीच्या छायेखाली आहेत. अगोदरच गावात लोक कमी आहेत आणि त्यातच कोरोनाने घरात बसावे लागत आहे, पण नुसता आवाज झाला तरी लोक बिबट्या आला म्हणून घराबाहेर धाव घेताहेत. वन विभागाने तातडीने या बिबट्याचा बंदोबस्त करून लोकांना भयमुक्त करावे, अशी आमची मागणी आहे.

-विक्रम रांजणे, ग्रामस्थ, वहागाव