पाटण - पतीचे अनैतिक संबंध बंद होत नसल्याचा राग मनात धरून पत्नीने त्याच्या अंगावर पेट्रोल ओतून पेटवून दिल्याचा प्रकार कोयना विभागातील अतिदुर्गम रिसवड (ता. पाटण) येथे आज सकाळी साडेसातच्या सुमारास घडला. बाळू संपत रोकडे (वय 44) असे जखमी पतीचे नाव आहे. तो 84 टक्के भाजला आहे. सीता (वय 37) असे पत्नीचे नाव आहे. रोकडेवर सातारा येथील जिल्हा शासकीय रुग्णालयात उपचार सुरू आहेत. घटनेमुळे पाटण तालुक्‍यात खळबळ उडाली आहे. रात्री उशिरापर्यंत गुन्ह्याची नोंद करण्याची प्रक्रिया कोयना पोलिसांत सुरू होती.

पोलिसांनी सांगितले, की रिसवड गावामधील बाळू संपत रोकडे याचे गावातील एका मुलीशी अनैतिक संबंध असल्याचा संशय त्याची पत्नी सौ. सीताला होता. त्याच कारणावरून त्यांच्यात वारंवार भांडणे होत होती. अनैतिक संबंध बंद करण्यासंदर्भात खटके उडत होते. याकडे पती बाळू रोकडे दुर्लक्ष करत होता. आज सकाळी साडेपाचपासून त्यांच्यात वाद सुरू होता. साडेसातच्या सुमारास बाळू रोकडे घरातील चुलीजवळ बसला होता. रागाच्या भरात सीताने "तू अनैतिक संबंध बंद कर,' असे म्हणत बाळूच्या अंगावर पेट्रोल ओतून त्याला पेटवून दिले. भाजलेल्या अवस्थेत बाळू रोकडे शेजारच्या नातेवाईकांकडे धावत गेला. पेटलेल्या अवस्थेत त्याने पत्नीने माझ्या अंगावर पेट्रोल ओतून जाळण्याचा प्रयत्न केला असल्याचे नातेवाईकांना सांगितले. त्यानंतर नातेवाईकांनी बाळूला तातडीने हेळवाक येथील प्राथमिक आरोग्य केंद्रात नेले. येथे त्याच्यावर प्राथमिक उपचार करण्यात आले. त्यानंतर त्याला सातारा येथील जिल्हा शासकीय रुग्णालयात दाखल केले आहे. घटनेची नोंद रात्री उशिरापर्यंत कोयनानगर पोलिसांत दाखल करण्याचे काम सुरू होते. सहायक पोलिस निरीक्षक एन. आर. चौखंडे तपास करत आहेत.