कोल्हापूर  ः कोल्हापुरच्या पालकमंत्री पदावर महसूल मंत्री बाळासाहेब थोरात हेच कायम रहाणार असल्याची शक्‍यता आहे. कॉंग्रेसच्या वरिष्ठ सुत्रांनीच ही माहिती दिली. श्री. थोरात यांनी नकार दिल्यास गृहराज्यमंत्री सतेज पाटील किंवा सहकार राज्यमंत्री डॉ. विश्‍वजित कदम यांच्यापैकी एकाला संधी मिळण्याची शक्‍यता आहे.

हे पण वाचा -  गाजलेल्या नाराजीनाट्यामुळे यांच्या पालकमंत्रीपदाला हुलकावणी

दरम्यान, श्री. थोरात यांनी आपल्याऐवजी श्री. पाटील किंवा डॉ. कदम यांची शिफारस केल्याची चर्चा होती. याबाबत श्री. थोरात यांच्याशी संपर्क साधला असता तो होऊ शकला नाही.

हे पण वाचा - राणेंवर दबाव ठेवण्यासाठी रत्नागिरीत सामंत अस्त्र

दोन दिवसांपुर्वी श्री. थोरात यांची कोल्हापुरच्या तर कोल्हापुरातील ग्रामविकास मंत्री हसन मुश्रीफ यांची अहमदनगर, गृहराज्यमंत्री सतेज पाटील यांची भंडारा जिल्ह्याच्या पालकमंत्रीपदी नियुक्ती झाली आहे. श्री. थोरात यांनी यापुर्वीच पालकमंत्री पद स्विकारणार नसल्याचे सांगितले होते. मंत्री आणि पक्षाच्या प्रदेशाध्यक्ष पदाच्या जबाबदारीमुळे पालकमंत्री पदाला वेळ देता येणार नाही अशी यामागची श्री. थोरात यांची भुमिका होती. मुख्यमंत्री उध्दव ठाकरे यांची भेट घेऊन ते तसे कळवणार होते. पण आजपर्यंत याबाबत काही घडामोडी झालेल्या नाहीत.

कॉंग्रेसकडून थोरातच
श्री. मुश्रीफ व गृहराज्यमंत्री पाटील दोघेही पालकमंत्री पदासाठी उत्सुक आहेत. मुश्रीफ हे कॅबिनेट तर पाटील राज्यमंत्री आहेत, त्यातून ज्येष्ठतेचा प्रश्‍न निर्माण होणार असल्याने दोघांऐवजी श्री. थोरात यांना संधी दिली; पण श्री. थोरात हेच उत्सुक नसल्याने पक्षांकडून डॉ. कदम किंवा श्री. पाटील यांची शिफारस केली जाण्याची शक्‍यता होती. आता ही शक्‍यताही दिसत नसून श्री. थोरात हेच पालकमंत्री म्हणून रहातील अशी चर्चा कॉंग्रेस वर्तुळात सुरू आहे.