बेळगाव : गेल्या दोन महिन्यांपासून बसपास वितरणाची प्रक्रिया बेळगाव परिवहन महामंडळाडून सुरु करण्यात आली आहे. मात्र, अद्यापही अनेक विद्यार्थी बसपासविनाच आहेत. त्यामुळे अशा विद्यार्थ्यांना तिकीट काढूनच शाळेला यावे लागत आहे. परिणामी, विद्यार्थ्यांना आर्थिक फटका बसत असून परिवहन मंडळाने बसपास वितरण प्रक्रियेला गती द्यावी, अशी मागणी विद्यार्थ्यांसह पालकांतून केली जात आहे.

कोरोनामुळे सुमारे दीड वर्षानंतर शाळा सुरु झाल्या आहेत. राज्यात नववी ते बारावीच्या वर्गांना २३ ऑगस्टपासून सुरुवात झाली आहे. तसेच ६ सप्टेंबरपासून सहावी ते आठवीपर्यंतचे वर्ग सुरु झाले आहेत. तर २५ ऑक्टोबरपासून पहिली ते पाचवीपर्यंतच्या वर्गांना सुरुवात झाली आहे. बेळगाव विभागात सुमारे दोन महिन्यांपासून बसपास वितरणाला सुरुवात झाली आहे. मात्र, अद्यापही अनेक विद्यार्थी बसपासविनाच आहेत. विद्यार्थ्यांना अजूनही बसपास मिळविण्यासाठी धडपड करावी लागत आहे. ग्रामीण भागातून येणाऱ्या अनेक विद्यार्थ्यांनी बसपास नसल्यामुळे शाळेला जाणे टाळले आहे.

बेळगाव परिवहन विभागात ७६ हजार बसपासधारक विद्यार्थी आहेत. सध्या सहावी ते बारावीच्या विद्यार्थ्यांना बसपास वितरित केले जात आहे. तसेच चार दिवसांपासून पहिली ते पाचवीच्या विद्यार्थ्यांचे वर्ग भरविले जात असल्याने त्यांच्याकडून अर्ज मागविले जात आहेत. त्यांनाही लवकरच बसपासचे वितरण केले जाणार आहे. मात्र, विद्यार्थ्यांना बसपास तातडीने द्यावेत, अशी मागणी होत आहे.

बेळगाव परिवहन विभागाकडून बसपासचे तातडीने वितरण केले जात आहे. आतापर्यंत अर्ज आलेल्यांपैकी ९५ टक्के बसपास वितरीत केले आहेत. पहिली ते पाचवीच्या विद्यार्थ्यांचे अर्ज स्वीकारण्यास सुरुवात केली आहे.

- के. के. लमाणी, परिवहन नियंत्रण अधिकारी