कुर्डुवाडी ( जि सोलापूर) : ऊसतोड करण्यासाठी चाललेल्या बैलगाड्यांना ने स्कॉर्पिओने मागून जोरात धडक दिली.या अपघातात एक 30 वर्षीय उसतोड कामगार व 1 बैल ठार झाले तर 1 ऊसतोड कामगार महिला व 2 बैल जखमी झाले आहेत. ही घटना कुर्डुवाडी बार्शी रस्त्यावरील पापनस गावाजवळ आज पहाटे साडे पाचच्या सुमारास घडली.

मिळालेल्या प्राथमिक माहितीनुसार, लक्ष्मण रामकीसन होगले ( वय 30 रा पाचवड ता परांडा जिल्हा उस्मानाबाद) असे मयत व्यक्तीचे नाव आहे.  पहाटेच्या  सुमारास चार बैलगाड्या रिधोरे गावाच्या दिशेने ऊसतोड करण्यासाठी निघाल्या होत्या. मागील बैलगाडीमध्ये लक्ष्मण होगले होते. त्या पुढील गाडीमध्ये प्रयागाबाई किसन उघडे ( वय 40 रा पाचवड ता परांडा) व त्यांचा मुलगा मुकेश उघडे हे दोघे होते.

पहाटेच्या सुमारास एका चारचाकी वाहनाने( स्कॉर्पिओ) सर्वात मागील बैलगाडीस धडक दिली. त्यामुळे ती बैलगाडी पुढच्या बैलगाडीला धडकली. या अपघातामध्ये लक्ष्मण होगले व गाडीचा बैल ठार झाले. प्रयागाबाई उघडे या जखमी झाल्या असून त्यांच्यावर बार्शी येथील दवाखान्यात उपचार सुरू आहेत. धडक एवढी जोरात होती की, मागील बैलगाडी पुढील बैलगाडीला अशा चार बैलगाड्या पुढे धडकल्या व  धडक बसल्यानंतर बैलगाडीतील लोक उडून बाहेर पडले.