बेळगाव - शहरातील मोकाट जनावरे पकडण्याची मोहीम महापालिकेने पोलिस बंदोबस्तात पुन्हा सुरू केली आहे. सोमवारी (ता.२३) पोलिस लाईन येथे जनावरे पकडताना महापालिकेच्या अतिक्रमण निर्मूलन पथकावर हल्ला झाला होता. त्यामुळे पथकाने मोकाट जनावरे पकडण्याची मोहीम बंद ठेवली होती.

पोलिस बंदोबस्तात पकडली जनावरे

हल्ल्याची घटना घडल्यानंतर अतिक्रमण निर्मूलन पथकाने महापालिका कार्यालयासमोर आंदोलन केले होते. पण, महापालिका आयुक्त किंवा आरोग्याधिकाऱ्यांनी या घटनेची गंभीर दखल घेतली नाही. या घटनेबाबत कॅंप पोलिस ठाण्यात तक्रार नोंदविणे आवश्‍यक होते, पण आरोग्याधिकारी डॉ. संजय डूमगोळ यांनी पोलिसांत तक्रार न करण्याचा निर्णय घेतला. शिवाय यापुढे पोलिस बंदोबस्तातच मोहीम राबविण्याचा आदेशही दिला. आरोग्याधिकाऱ्यांच्या या भूमिकेमुळे पथकाचे मानसिक खच्चीकरण झाले असून पथकाने तीन दिवस मोहीम थांबविली. पण शहरात मोकाट जनावरांची संख्या व त्यामुळे समस्या वाढल्यामुळे पुन्हा मोहीम राबविण्याचा निर्णय घेण्यात आला.

पाहा - लोकांना गोळ्या घाला म्हणणारा हा कोण ? प्रा.एन.डी.पाटील खवळले...

हल्ल्याच्या पार्श्वभूमीवर सावधानता

शुक्रवारी (ता. २७) अतिक्रमण निर्मूलन पथकाने खडेबाजार पोलिस ठाण्याच्या हद्दीत मोहीम राबविली. त्यासाठी खडेबाजार ठाण्याकडून पोलिस बंदोबस्त पुरविण्यात आला. 
सकाळच्या टप्प्यातच ही मोहीम राबविण्यात आली असून चार मोकाट जनावरे पकडण्यात आली. खडेबाजार येथील शीतल हॉटेल परिसर, नरगुंदकर भावे चौक व शेरी गल्ली या ठिकाणी पथकाने मोहीम राबविली. पकडलेली जनावरे केके कोप्प येथील गोशाळेत सोडली जातात. जनावरे गोशाळेकडे नेताना जनावरांच्या मालकांकडून पाठलाग होतो. अनेकदा त्यांच्याकडून हल्लाही केला जातो. त्यामुळे गोशाळेपर्यंत पोलिस अतिक्रमण निर्मूलन पथकासोबत होते. त्यामुळे शुक्रवारची मोहीम यशस्वी पार पडली. महापालिकेकडून गेल्या दोन महिन्यांपासून नियमितपणे ही मोहीम राबविली जात आहे. तरीही शहरातील मोकाट जनावरांची संख्या कमी झालेली नाही.