कुर्डुवाडी (सोलापूर) - समाजप्रबोधनपर गायन करणारे कुर्डुवाडी येथील महात्माजी ( बापुराव) जाधव यांनी माढा तालुका पंचायत समितीच्या प्रांगणात छत्रपती शिवाजी महाराज यांच्या कर्तुत्वावर गायलेल्या पोवाड्याचा व्हिडिओ सध्या सोशल मीडियावर खूप मोठ्या प्रमाणात व्हायरल होत आहे.

हा व्हिडिओ सुप्रियाताई सुळे फॅन पेज, रुपालीताई चाकणकर एफ सी, महाविकास आघाडी , गावरान वादळ यासह अनेक सोशल मीडीया पेजवर शेअर करण्यात आला असून लाखो लोकांनी पाहिला आहे.

मुळचे रणदिवेवाडी (ता माढा) येथील रहिवासी असलेले व शालेय शिक्षण न घेतलेले बापूराव यांचे वडील हे अंध व शाहिर होते. त्यांच्याकडुन शाहिरीचा वारसा मिळाला. बापुराव यांना म्हैसगाव येथील त्यांचे गुरु दगडुअण्णा यांच्याकडून कलेचे ज्ञान मिळाले. वडिलांबरोबर गायन करताना त्यांना शिकावयास मिळाले. ते समाजप्रबोधनपर कार्यक्रमाबरोबर भेदी गायन करतात. जिल्ह्यातच नव्हे तर राज्यात धार्मीक कार्यक्रम, यात्रा, दिंड्या असतील तेथे जाउन आपली कला एकटेच सादर करतात. हे गायन सादर करताना त्यांच्याकडे फक्त तुणतुणे, हातातील घुंगरू व डफ ही तीन वाद्ये असतात. तीनही वाद्ये ते स्वतःच वाजवत गायन करतात.

छत्रपती शिवाजी महाराज, छत्रपती संभाजी महाराज यांच्यावरील पोवाडे, पौराणिक कथा, रामायणे, कबीरांचे हिंदी दोहे, आई-वडिलांना सांभाळण्या बाबत जागरुकता करणारी काव्ये, चालु वाईट घटनांवर टिपण्णी करणारी गीते त्यांनी सादर केली आहेत़. इतर शाहीरांचे पोवाडे ते सादर करतातच त्याबरोबर स्वतः ही काव्यरचना करुन ते गायन व वादनाद्वारे सादर करतात. त्यांना पत्नी व एक छोटा मुलगा आहे. मुलाला ते शालेय शिक्षणाबरोबर भजन, किर्तन, गायन याचेही शिक्षण देउ इच्छितात.

माढा तालुका पंचायत समिती येथील एका कार्यक्रमात शाहीर जाधव यांनी हा 'असा होता शिवबा माझा माणुसकीची खाण, आनंदाने नांदत होते हिंदू मुसलमान...' हा पोवाडा गायला होता. त्यावेळी बांधकाम विभागातील महेश शेंडे यांनी व्हिडिओ चित्रण केले होते. हा व्हिडिओ प्रचंड व्हायरल झाला आहे. आतापर्यंत त्यांनी अनेक राजकीय, सामाजिक, शैक्षणिक, अध्यात्मिक क्षेत्रातील मान्यवर लोकांसमोर कार्यक्रम सादर केले आहेत.