म्हैसाळ (सांगली) - राज्याचे मुख्यमंत्री आणि शिवसेनेचे पक्षप्रमुख उध्दव ठाकरे यांच्या बद्दल कर्नाटकाचे माजी मंत्री बसवराज होरट्टी यांनी केलेल्या आक्षेपार्ह विधानाचे मोठे पडसाद आज ता.२९ रोजी कर्नाटक महाराष्ट्र सीमाभागातील म्हैसाळ (ता.मिरज) बाॅड्री येथे उमटले.

कर्नाटक रक्षक वेदिका संघटनेच्या उपस्थितीने तणाव

कर्नाटकचे मुख्यमंत्री बी.एस.येडीयराप्पा,कर्नाटक नवनिर्माण सेनेचा भिमाशंकर पाटील यांच्या निषेधार्थ जिल्हा शिवसेनेच्या वतीने तिरडी मोर्चा काढण्यात आला.कर्नाटक रक्षक वेदिका संघटनेचे कार्यकर्ते देखील येथे आल्याने तणावाचे वातावरण निर्माण झाले होते.दोन्ही बाजूकडून मोठी घोषणाबाजी करण्यात आली.तणावाच्या पार्श्वभूमीवर मिरजेचे उपविभागीय पोलिस अधिकारी संदिपसिंह गिल तातडीने घटनास्थळी दाखल झाले.

हेही वाचा - कोण तो उद्धव ठाकरे ? उपद्‌व्यापी ठाकरे आहे तो...  कोणी उधळली ही मुक्ताफळे ?

'सिमेवर येतोय,गोळ्या घालायला ये' असे केले होते आव्हान

सांगली जिल्हा शिवसेनेच्या वतीने या आंदोलनाचे आयोजन करण्यात आले होते.कर्नाटक रक्षक वेदिका संघटनेच्या वतीने मुख्यमंत्री उद्धव ठाकरे यांच्या पुतळ्याचे दहन केल्याने मोठी तणावपूर्ण वातावरण निर्माण झाले होते.शिवसेनेच्या घोषणांनी परिसर दुमदुमून गेला होता.जिल्हाप्रमुख आनंदराव पवार यांनी कर्नाटक नवनिर्माण सेनेचा भिमाशंकर पाटील याला काल दूरध्वनीवरून संपर्क करुन सिमेवर येतोय गोळ्या घालायला ये असे आव्हान दिले होते.या पार्श्वभूमीवर कर्नाटक पोलीसांनी देखील आपला बंदोबस्त आपल्या राज्यांच्या हद्दीत तैनात केला होता.यावेळी विशाल रजपुत, संजय काटे,अमोल पाटील, चंद्रकांत मैगुरे,पप्पू शिंदे, महादेव मगदुम,शंभोराज काटकर आदि उपस्थित होते.