सोलापूर : प्रबळ दावेदार असूनही उमेदवारी न मिळाल्याने झालेली बंडखोरी.., निष्ठावंतांना डावलून ठरावीक लोकांना मिळणारा सन्मान.., जिल्हा संपर्कप्रमुख तानाजी सावंत आणि समन्वयक शिवाजी सावंत यांच्याविषयी असलेला रोष.., गेल्या महिन्याभरात विस्कटलेली पक्षाची घडी.. याबाबत शिवसेना पक्षप्रमुख उद्धव ठाकरे काय भूमिका घेतात याकडे सर्वांचे लक्ष लागले आहे.

महायुतीमधील शिवसेनेचे उमेदवार बार्शीतील दिलीप सोपल, माढ्याचे संजय कोकाटे, करमाळ्याच्या रश्‍मी बागल, सांगोल्याचे शहाजी पाटील, मोहोळचे नागनाथ क्षीरसागर, शहर मध्यचे दिलीप माने आदी उमेदवारांच्या प्रचारासाठी शिवसेना पक्षप्रमुख उद्धव ठाकरे सोमवारी जिल्हा दौऱ्यावर येत आहे.

दरम्यान, उमेदवारी वाटपानंतर जिल्ह्यातील शिवसेनेत बरीच पडझड झाली आहे. मात्र, काहीच झाले नाही असे दाखवण्याचा प्रयत्न सावंत बंधूंसह अन्य पदाधिकाऱ्यांकडून होत आहे. महेश कोठे यांनी तर उघडउघड पक्षातील चौकडीवर टीका केली. मेळाव्यासह गल्लीबोळातील बैठकीतही ते शिवसेनेत जातीचे राजकारण कसे चालतेय हे लोकांना सांगत आहेत. 

माजी मंत्री उत्तमप्रकाश खंदारे यांनी पक्षात काहीच अलबेल नसल्याचे बोलून दाखविले आहे. मनोज शेजवाल यांनी शिवसेनेला मोहोळमधून जोरदार लढत देण्याची तयारी केली आहे.

करमाळा विधानसभा मतदारसंघात शिवसेनेच्या उमेदवार रश्‍मी बागल यांचे धनुष्यबाण रोखण्यासाठी बंडखोर नारायण पाटील यांचे प्रयत्न चालू आहेत. अन्य विधानसभा मतदारसंघात थोडीफार धुसफूस आहेच, पण पदाधिकाऱ्यांनी शिवसेनेला "अच्छे दिन' आल्याचे सांगत पक्षप्रमुखांच्या दौऱ्याची जोरदार तयारी केली आहे.